ქართველების „ანორთოსისმა“ საჩემპიონო ჯგუფის პირველი შეხვედრა საკუთარ მოედანზე, „აპოლონის“ წინააღმდეგ გამართა და ფრედ, 2:2 ითამაშა.
მატჩში მონაწილეობა ოთხივე ქართველმა მიიღო. გიორგი ლორიამ, თორნიკე ოქრიაშვილმა და გიორგი ქვილითაიამ შეუცვლელად ითამაშეს, ბუბა დაუშვილი კი ქეცბაიამ 63-ე წუთზე გამოცვალა.
მატჩი საკმაოდ დაძაბული და სანახაობრივიც გამოდგა. „ანორთოსისი“ მეტოქესთან 0:2 მარცხდებოდა, თუმცა თამაშის გადარჩენა ქართველი ფეხბურთელების გოლებით შეძლო.
ანგარიში მე-10 წუთზე აპოლონმა დიგინის გოლით გახსნა. 23-ე წუთზე მთავარმა მსაჯმა მოედნიდან სტუმართა ფეხბურთელი გააძევა, თუმცა კაცნაკლულმა „აპოლონმა“ მეორე გოლის გატანა მაინც შეძლო. მე-60 წუთზე დიგინმა საკუთარი გუნდის უპირატესობა ორბურთამდე გაზარდა.
ერთი შეხედვით, „ანორთოსისი“ გამოუვალ მდგომარეობაში აღმოჩნდა, თუმცა ქეცბაიას ბიჭებმა მობილიზება მაინც შეძლეს და თორნიკე ოქრიაშვილის და გიორგი ქვილითაიას გოლებით მატჩის გადარჩენა შეძლეს.
65-ე წუთზე ოქრიმ სხვაობა მინიმუმამდე შეამცირა, 79-ე წუთზე კი ქვილითაიამ მეტოქის კარი თერთმეტმეტრიანი ნიშნულიდან აიღო და ანგარიში გაათანაბრა. დარჩენილ დროში „ანორთოსისმა“ მოსაგებადაც გაიწია, თუმცა ანგარიში აღარ შეცვლილა.
27 ტურის შემდეგ „ანორთოსისი“ სატურნირო ცხრილში 52 ქულით მეოთხე ადგილს იკავებს და ლიდერ „ომონიას“ 7 ქულით ჩამორჩება.
