ამ დონის გუნდში თამაში ჩემთვის დიდი გამოწვევაა – ინტერვიუ რეზი ინჯგიასთან

კვიპროსის საფეხბურთო ჩემპიონატში კიდევ ერთი ქართველი ფეხბურთელი ითამაშებს. 20 წლის თავდამსხმელმა, რევაზ ინჯგიამ კონტრაქტი „აპოლონთან“ გააფორმა და მომავალი სეზონიდან აღნიშნული კლუბის ღირსებას გიორგი პაპუნაშვილთან ერთად დაიცავს.

ახალგაზრდა ფეხბურთელი „ლოკომოტივის“ აღზრდილია და თბილისური გუნდის შემადგენლობაში რამდენიმე წლის განმავლობაში გამოდიოდა.მან ეროვნული ლიგის წლევანდელი სეზონი “თელავში” გაატარა. 20 წლის ფეხბურთელი პარალელურად საქართველოს ასაკობრივი ნაკრებების ღირსებასაც იცავდა.

„პრაიმ სპორტი“ რეზი ინჯგიას დაუკავშირდა და მასთან მცირე ინტერვიუ ჩაწერა:

– როგორ შეაფასებდი შენს ტრანსფერს აპოლონში?

– ამ დონის გუნდში თამაში ჩემთვის ძალიან დიდი გამოწვევაა, ძალიან კმაყოფილი ვარ ამ ტრანსფერით და იმედია დრო ბევრ სიახლეს გვიჩვენებს.

– როგორ შეაფასებდი კვიპროსის ლიგას?

– ძალიან ძლიერი დონის ჩემპიონატია.

– გიორგი პაპუნაშვილის ფაქტორზე, რომ გვესაუბრო…

– გიორგის ფაქტორმა ჩემზე ძალიან კარგად იმოქმედა, ძალიან ბევრ საკითხში დამეხმარა. ასეთი ადამიანი ადაპტაციისთვის ყველას სჭირდება და მადლობა მას ამისთვის.

– როგორ დაახასიათებდი აპოლონს?

– ძალიან კარგი დონის გუნდში ვარ და ჩემი მთელი ჩემი ფიქრი ამ კლუბზეა გადმორთული. პირველ რიგში, მიზანი მაქვს, რომ აპოლონში ჩემი შესაძლებლობები დავამტკიცო და კლუბთან ერთად ტიტულები მოვიპოვო.

– სხვა შემოთავაზებები თუ გქონდა და რატომ გადაწყვიტე აპოლონში გადასვლა?

– მქონდა სხვა გუნდებიდანაც შემოთავაზება, მაგრამ კიდევ ერთხელ ხაზს გავუსვამ, რომ აპოლონი ძალიან მაღალი დონის გუნდია და აქ თამაშზე უარს არავინ იტყოდა, ამიტომაც მივიღე ეს გადაწყვეტილება.

– როგორ ფიქრობ, რა არის შენი ძლიერი და სუსტი მხარე? 

– ჩემი ძლიერი მხარე ზონაში გახსნა და სისწრაფეა, სუსტი ფიზიკურობა. ამ სისუსტის გამოსწორებას ყველანაირად ვცდილობ. ამაში აპოლონიც მეხმარება.

– ადაპტაციის პერიოდს როგორ გადიხარ? მწვრთნელმა და თანაგუნდელებმა როგორ მიგიღეს?

– ძალიან კარგად. ბიჭები, მწვრთნელები, მთლიანად პერსონალი ძალიან კარგად დამხვდა და ამისთვის, მინდა დიდი მადლობა გადავუხადო. ყველა ფეხბურთელის წვრილმან პრობლემას დიდი ყურადღებით უდგებიან, რაც ჩემთვის უმნიშვნელოვანესია.

– როგორ სეზონს ელოდები

– რთული და გრძელი სეზონი გველოდება მეც და გუნდსაც. პირველ რიგში ვფიქრობ, რომ უდიდესი გამოცდილების მომტანი იქნება ეს სეზონი ჩემთვის, ამიტომ წესით კარგი სეზონი გველოდება.

– შენი ოცნების გუნდი?

– მადრიდის რეალი.

– შენს პოზიციაზე ვინ მიგაჩნია საუკეთესოდ?

 – რონალდო.

– ასაკობრივ ნაკრებში თუ გითამაშია?

– კი, U19 და U21 ნაკრებებში.

– რას ეტყოდი თელავს?

– თელავი ისეთ დროს მენდო და დამეხმარა, როდესაც რთული პერიოდი მქონდა, მათ ამ გვერდში დგომისთვის დიდ მადლობას ვუხდი და ყოველთვის მადლობელი ვიქნები.

– რა არის შენი ოცნება?

– ოცნება მაქვს, რომ ეროვნულ ნაკრებში მომეცეს თამაშის საშუალება. ასევე ჩემპიონთა ლიგაზე თამაშიც.

– და ბოლოს, ევროპის ჩემპიონატს როგორ შეაფასებდი და შენი აზრით ვინ გახდება ჩემპიონი?

– ჩემი აზრით ერთ-ერთი ყველაზე გამორჩეული ევროპის ჩემპიონატია. ყველა ნაკრებმა თავისი თამაშით დაამტკიცა, რომ არავისზე ნაკლები გუნდი არ ჰყავს. ჩემპიონი ვინ გახდება ამის თქმა რთულია, დაველოდოთ.