საქართველოს ნაკრების თავდამსხმელი, გიორგი ქვილითაია კვიპროსში შეუჩერებელია. ქვეყნის პირველობის 22-ე ტურში ქართველების ანორთოსისი საკუთარ მოედანზე კარმიოტისს დაუხვდა და დაძაბულ ბრძოლაში მინიმალური სხვაობით, 2:1 დაამარცხა.
შეხვედრაში ანგარიში სწორედ ქართველმა ფეხბურთელმა გახსნა. მე-7 წუთზე ქვილითაიამ მცველის შეცდომით ისარგებლა და მეკარესთან პირისპირ დარჩენილს გოლის გატანა არ გასჭირვებია. პირველ ტაიმში ანორთოსისმა კიდევ ერთი გოლი გაიტანა და შესვენებაზე ორბურთიანი უპირატესობით გავიდა.
მეორე ნახევარში სტუმრებმა ერთი გოლის გაქვითვა მოახერხეს, თუმცა გამარჯვება მაინც ქეცბაიას გუნდს დარჩა.
გიორგი ქვილითაიას გარდა შეხვედრაში მონაწილეობა კიდევ ორმა ქართველმა ფეხბურთელმა მიიღო – გიორგი ლორია და ბუბა დაუშვილი.
22 ტურის შემდეგ, ანორთოსისი სატურნირო ცხრილში 43 ქულით მესამე ადგილს იკავებს. რაც შეეხება გიორგი ქვილითაიას, მას უკვე 18 მატჩში 12 გოლი დაუგროვდა და ტურნირის ბომბარდირობისთვის იბრძვის.
