საქართველოს ფეხბურთელთა ნაკრები ამხანაგური მატჩებისთვის მზადებას აქტიურად განაგრძობს. დღეს, ქართველმა ფეხბურთელებმა მიხეილ მესხის სახელობის სტადიონზე ივარჯიშეს. ვილი სანიოლის განკარგულებაში ამ ეტაპზე 24 ფეხბურთელია.
ვარჯიშის დასრულების შემდეგ მოახლოებულ მატჩებზე ეროვნული გუნდის შემტევმა, გიორგი ბერიძემ ისაუბრა.
„წინა შეკრებისგან განსხვავებით დიდი დრო გვაქვს და ეს ხელს შეგვიწყობს, რომ კარგად მოვემზადოთ თამაშებისთვის. უფრო გავიცნობთ ერთმანეთს და უფრო კარგად შევთამაშდებით ამხანაგური თამაშებისთვის. როდესაც საქმე ეხება ეროვნულ ნაკრებს არ აქვს მნიშვნელობა თამაში ამხანაგურია თუ ოფიციალური. მოტივაცია მაღალ დონეზეა და ორივე თამაშში წარმატებისთვის ვიბრძოლებთ“, – აღნიშნა ბერიძემ.
შეგახსენებთ, რომ საქართველოს ფეხბურთელთა ეროვნული ნაკრები ამხანაგურ შეხვედრებში 2 ივნისს რუმინეთის, 6 ივნისს კი ნიდერლანდების ნაკრებს დაუპირისპირდება.
