UFC-ის ქართველმა მებრძოლმა, მერაბ დვალიშვილმა აშშ-ში ოჯახის სიწმინდის და ქართული სამოსის დღესთან დაკავშირებულ ღონისძიებაში მიიღო მონაწილეობა.
ღონისძიება ჩრდ. ამერიკის ეპისკოპოსის, მეუფე საბას ორგანიზებით ჩატარდა. როგორც მებრძოლი სოციალურ ქსელში წერს, 17 მაისს შეერთებულ შტატებში მსგავსი ღონისძიების გამართვის ტრადიციას საფუძველი დღეიდან ჩაეყარა.
მერაბი საკუთარ Facebook-გვერდზე ვიდეოსაც ავრცელებს და ღონისძიების შესახებ წერს.
„წმ. დავით აღმაშენებლის სახ.საკათედრო ტაძარში (პოკონო) 59 Charles street, Ashley, PA 18706 ჩატარდა სახალხო დღესასწაული, რომელიც ეძღვნებოდა „ოჯახის სიწმინდის დღესა“ და „ქართული სამოსის დღეს“. ჩრდილოეთ ამერიკის ეპისკოპოსი საბას ლოცვა-კურთხევით ამ ორი დღესასწაულის ერთად აღნიშვნის ტრადიციას ამერიკაში წელს ჩაეყრება საფუძველი. საღმრთო ლიტურგიის მსახურების შემდეგ ტაძრის ეზოში გაიმართა ტრაპეზი, საწნახელში დაიწურა ყურძენი, მოდუღდა თათარა, ამოივლო ჩურჩხელები. დასასრულს მოხდა ჩოხოსანთა რიგებში ახალ წევრთა გაწევრიანება. რისი პატივი მეც მერგო და მადლობას ვუხდი ყველა იმ ადამიანს ვინც ამის ორგანიზებაში წვლილი შეიტანა და აკეთებენ ძალიან დიდ საქმეს ჩვენი კულტურის შესანარჩუნებლად და გასავითარებლად ემიგრაციაში რამდენიმე წელია უკვე.“ – წერს მერაბ დვალიშვილი.
