როგორც იქნა „მანჩესტერ სიტი“ ჩემპიონთა ლიგის ფინალშია. პეპ გვარდიოლამ ეს ქალაქელებში მუშაობის მეხუთე წელს მოახერხა.
მატჩესტერულმა გრანდმა „პსჟ“ ორი მატჩის ჯამში 4:1 დაამარცხა, განმეორებითი დაპირისპირება კი 2:0 მოუგო.
ბუნებრივია, „სიტის“ მთავარი მწვრთნელი ამ წარმატებით ბედნიერია და სეზონის შთამბეჭდავად დასრულებას გეგმავს.
„ძალიან ამაყი და ბედნიერი ვარ. ამ წარმატებაში წვლილი გუნდის თითოეულმა ფეხბურთელმა შეიტანა, იმათმაც, ვინც დღეს მოედანზე არ ყოფილან.
ახლა შეგვიძლია მცირე ხნით თავს უფლება მივცეთ ამ გამარჯვებით დავტკბეთ და ვისიამოვნოთ. პრემიერლიგის მოგება ჩვენთვის მთავარი ამოცანაა და იმედია ასეც მოხდება, შემდეგ კი ჩემპიონთა ლიგის ფინალისთვის მშვიდად მოვემზადებით.
„პსჟ“ არის გუნდი, რომელიც მუდამ მოგებისკენ ისწრაფვის. მატჩის დასაწყისში პრესინგის თამაში გაგვიჭიდა, თუმცა შემდეგ ეს გამოვასწორეთ. არ დაგვავიწყდეს, ჩვენმა დღევანდელმა მეტოქემ ჩემპიონთა ლიგის გათამაშებას ბარსელონა და ბაიერნი გამოთიშა. ამიტომაც, ეს გამარჯვება ორმაგად სასიხარულოა.
საოცარი გრძნობა მაქვს. ჩვენ ლიგის ფინალში ვართ. ამისკენ 5 წელი მივილტვოდით, ერთად ვიბრძოლეთ და მიზანსაც მივაღწიეთ.
ჩემპიონთა ლიგა რთული და ამავდროულად საუკეთესო ტურნირია. მასში რაღაც ზებუნებრივი ხელი ურევია. აქ წარმატებით თამაში დიდ სიამოვნებას განიჭებს“ – აღნიშნა პეპ გვარდიოლამ.
