11 ივლისს, ილია თოფურია საბრძოლო ლიგაში მორიგ შეხვედრას გამართავს. 24 წლის მებრძოლის მეტოქე საკმაოდ გამოცდილი ამერიკელი მებრძოლი, 36 წლის რაიან ჰოლი იქნება.
რუსთავი 2-ის გადაცემა „სპორტის საათის“ შემოქმედებითი ჯგუფი ილიას ესპანეთში დაუკავშირდა და მასთან მცირე ინტერვიუ ჩაწერა.
თოფურიამ რამდენიმე მნიშვნელოვან საკითხზე ისაუბრა, მათ შორის მომავალ მეტოქეზე, პედი პიმბლეტზე, დანა უაითთან ურთიერთობაზე და ქართველ მებრძოლებზე:
„რაიან ჰოლზე ცუდს ვერ ვიტყვი, იმიტომ რომ ძალიან გამოცდილი მებრძოლია. დიდი ხანია რაც MMA-ში და ბრაზილიურ ჯიუჯიცუში იღებს მონაწილეობას, Ultimate Fighter-ის ერთ-ერთი სეზონის გამარჯვებულიც არის, თან იმ სეზონის, რომელსაც ძალიან ბევრმა ადამიანმა უყურა, კონორ მაკგრეგორი იყო ერთ-ერთი გუნდის მწვრთნელი და მაგიტომ. სიმართლე გითხრათ, დარწმუნებული ვარ, რომ გამარჯვებას მოვიპოვებ, იმიტომ რომ წარმატების მისაღწევად ბედისწერას არ ველოდები. ყოველდღე ვშრომობ და გამარჯვებაში ეჭვი არ მეპარება“, – განაცხადა ილია თოფურიამ.
26 წლის ბრიტანელმა მებრძოლმა, პედი პიმბლეტმა რამდენიმე დღის წინ ქართველებზე ისაუბრა და ჩვენი ქვეყანა უხამს კონტექსტში მოიხსენია. თოფურიამ ამის შესახებაც ისაუბრა:
„ასეთ რაღაცეებზე არასდროს ვბრაზდები, იმიტომ რომ ვიცი არცერთ მებრძოლს გულის სიღრმეში ცუდი არ უდევს, უბრალოდ გაუნათლებელია და არ იცის სად რა უნდა თქვას. პირველ რიგში, ზიზღით ნამდვილად არავინ მეზიზღება, რა უნდა გამიკეთოს ადამიანმა ისეთი, რომ შემზიზღდეს. მეორე, თუ ჩემზე ადრე შევა რეიტინგში მივულოცავ და მესამე, თუ გზაზე გადამეკვეთება და ბრძოლა მოგვიწევს, დიდად ვწუხვარ მასზე“, – აღნიშნა 24 წლის მებრძოლმა.
ილიამ ქართველ მებრძოლებზე და დანა უაითთან ურთიერთობაზეც ისაუბრა:
„არ ვიცი სხვა ქართველ მებრძოლებთან როგორაა, მაგრამ ჩემთან ნორმალური ურთიერთობა აქვს. ისეთი განსაკუთრებულიც არა, რომ ვთქვა ერთმანეთს ვწერთ, ვურეკავთ და ა.შ., მაგრამ ვგრძნობ, რომ ჩემს მიმართ რაღაც სიმპათია აქვს და პოტენციალს ხედავს.
ჩართული ვარ რამდენიმე პროექტში. ჩემს მენეჯმენტს ველაპარაკე, რომ ქართველი მებრძოლებისთვის უფრო დიდი ყურადღება მიექციათ. თუ იყო რამდენიმე ტალანტი, მათთვის UFC-ში გამოსვლის, ან რომელიმე დიდ ორგანიზაციაში ბრძოლის შესაძლებლობა მიეცათ. ზოგადად, ქართველ მებრძოლებზე კარგის მეტს ვერაფერს ვიტყვი. აი ახლა გიგა ჭიკაძეს აქვს დიდი ბრძოლა წინ და დარწმუნებული ვარ, რომ ამ ბრძოლას მოვიგებთ. რაც არ უნდა მოხდეს, პატარა ქვეყნიდან მოვდივართ და ძალიან კარგია, როცა ქართველი ადამიანი იბრძვის ამხელა ორგანიზაციაში. ქართველებმა გასულ წელს მგონი კარგი შედეგი დავდეთ და დარწმუნებული ვარ, 2021-ში უფრო უკეთესი იქნება“, – ამბობს თოფურია.
შეგახსენებთ, რომ ილია თოფურამ, იგივე „ელ მატადორმა“ 2020 წელს UFC-ში 2 ბრძოლა გამართა და ორივე შემთხვევაში გაიმარჯვა. ქართველმა მებრძოლმა 19 ოქტომბერს იოსიფ ზალალი, 5 დეკემბერს კი დეიმონ ჯონსონი დაამარცხა.
