საქართველოს პირველი არხის გადაცემა “საფეხბურთო ტაიმაუტში” საქართველოს ნაკრების და “ტულას” არსენალის ფეხბურთელმა ზურიკო დავითაშვილმა ისაუბრა.
მან საქართველოს ნაკრების განვლილი წელი შეაფასა და თავის მომავალზეც გააკეთა კომენტარი.
“ყველას გვინდა სტაბილურად მოგება, მაგრამ ყოველთვის ისე არაა, როგორც გვინდა, მაგრამ წელი ისე დავასრულეთ, რომ ყველას იმედი გაგვიჩნდა.
ნაკრებში უკეთესი სეზონი მქონდა, სადებიუტო გოლიც გავიტანე და ვფიქრობ, რომ ნორმალური თამაშებიც ჩავატარე. იმედია, მომავალ წელს ეროვნული გუნდისთვის გაცილებით მეტს გავაკეთებ. შარშანდელი სეზონი არც კლუბში მქონია. გატანაც დავიწყე და უკეთ ვთამაშობ, მაგრამ უფრო უნდა მოვუმატო. ხედავ, რაღაც არაა კარგად, საკუთარ თავს უფრო მეტს სთხოვ: პროფესიონალიზმის, ვარჯიშის და ყველა კუთხით. როდესაც საქმისთვის თავს გადადებ, ყოველთვის გიფასდება.
მე და ხვიჩა როგორც ძმები ისე ვართ. რაც შეეხება მის ფორმას, ბოლოს ყველამ მოუმატა. ჩავარდნა გუნდებსაც ახასიათებს და ფეხბურთელებსაც, ასეთები ხდება და არც ხვიჩა იყო გამონაკლისი, მაგრამ მერე ფორმაში შევიდა და შვედეთთან ვნახეთ, როგორც ითამაშა, ორი გოლი გაიტანა. მერე ფეხი აწუხებდა, თანაც, მწვრთნელთან ურთიერთობებიც. ჩვენ, ორივეს კარიერის გაგრძელება ევროპაში, მაღალი დონის კლუბში გვსურს, მაგრამ ხალხმა ჯერ უნდა იცოდეს, წინა სეზონში რა გააკეთე. ჩემზე და ჯუღელზე იწერებოდა, “არსენალში” როგორ წაიყვანაო, მაგრამ წინა სეზონი ისე არ მითამაშია, რომ ნორმალური კლუბის ინტერესში ვყოფილიყავი, ამიტომ “არსენალი” ჩემთვის კარგია და ტრამპლინად გამოიყენებ. კვარაცხელიას განსხვავებული ვითარება აქვს, უნდა წავიდეს და ღმერთის წყალობით, კარგ კლუბში ვიხილავთ”, – განაცხადა ზურიკომ საქართველოს პირველი არხის ეთერში.
