“დინამოს თბილისის” ლეგენდარულმა ფეხბურთელმა, ვლადიმერ გუცაევმა საქართველოს პირველი არხის გადაცემა “საფეხბურთო ტაიმაუტში” უკრაინაში არსებულ მდგომარეობაზე ისაუბრა და მათ მხარდაჭერა გამოუცხადა.
“დღეს მთავარი თემა არის ის, რაც არა მარტო უკრაინის, არამედ, ვფიქრობ, მთელ მსოფლიოს თავს ხდება. ომი კარგი არასოდეს ყოფილა და პირველ რიგში ეს ჩვენ ვიცით ყველაზე კარგად, რადგან საქართველოში ორი ომი გადავიტანეთ.
უკრაინასთან მთელ საქართველოს კარგი კავშირები გვაქვს. უკრაინაში ბევრჯერ ვარ ნამყოფი… კიევის “დინამოს” ყოფილ მოთამაშეს, ბურიაკს და ბესონოვს ველაპარაკე. ყველა ერთხმად ამბობს, რომ ძალიან რთული ვითარებაა. ტელევიზორში ყოველდღე ვუყურებთ, რაც იქ ხდება, მაგრამ სულ სხვაგვარი ემოციაა, როდესაც ამ საშინელებაზე თავად გიყვებიან. ეს არაა მხოლოდ უკრაინელების ქვეყანა, ეს მთელი მსოფლიოს ქვეყანა და ტკივილია. ნებისმიერი ომი ძალიან ცუდია. ხომ იცით, ყველაზე ცუდი მშვიდობა გერჩივნოს ნებისმიერ ომს.
სანქციებს რაც შეეხება, რუსული ფეხბურთი ბოლო 20 წელია ისეთი დონის არ არის, როგორიც ამხელა ქვეყანას შეუძლია. იქ ყველაფერს ლეგიონერები ქმნიდნენ. მათი წასვლით კი რუსეთის პრემიერლიგა ძალიან დიდ დარტყმას მიიღებს”, – განაცხადა გუცაევმა პირველი არხის ეთერში.
