თბილისის “დინამოს” ლეგენდარული ფეხბურთელის ვიტალი დარასელიას გარდაცვალებიდან 39 წელი გავიდა.
მოგეხსენებათ “დინამოს” ლეგენდარული 7-იანი 1982 წლის 13 დეკემბერს ხარაგაულის რაიონში ავტოკატასტროფის შედეგად დაიღუპა.
ვიტალი დარასელია არასდროს მიეცემა დავიწყებას, რადგან ქართული ფეხბურთის ისტორიაში მან ყველაზე მნიშვნელოვანი გოლი 1981 წლის 13 მაისს, დიუსელდორფში გერმანული “კარლ ცაისის” წინააღმდეგ თამაშის დასრულებამდე სამი წუთით ადრე გაიტანა, რის შედეგადაც თბილისის “დინამომ” 2-1 მოიგო და თასების მფლობელთა თასს ისტორიაში პირველად დაეუფლა.
ვიტალია დარასელია ნახევარმცველის პოზიციაზე ჯერ ოჩამჩირის “ამირანში” 1973-1974 წლებში თამაშობდა, შემდეგ კი 1975-1982 წლებში თბილისის “დინამოს” ღირსებას იცავდა. მან “დინამოს” რიგებში 192 მატჩი ჩაატარა და 26 გოლი გაიტანა. დარასელია საბჭოთა კავშირის მასშტაბით 33 საუკეთესო ფეხბურთელს შორის 5-ჯერ მოხვდა და არაერთ საპატიო ტიტულს დაეუფლა.
ვიტალი დარასელიას გარდაცვალებას მაშინ “დინამო თბილისის” ლეგენდარული მოთამაშე დავით ყიფიანიც იხსენებდა.
“ვიტალის გარდაცვალების ამბავი, რომ გავიგე ჩემ ოჯახთან ერთად ბორჯომში ვისვენებდი. ბორჯომიდან პირდაპირ რიკოთზე გავარდი, სადაც ეს ტრაგედია მოხდა. ვიტალისთვის 13 რიცხვი საბედისწერო იყო, ამ რიცხვში მოკვდა, ისიც აღსანიშნავია, რომ 13 მაისს გაიტანა ყველაზე მნიშვნელოვანი გოლი. 13 ნომრიანი მაისურით ითამაშა, ესპანეთში, მსოფლიო ჩემპიონატზე და ბოლოს მის ცხედარს 13 დღე ვეძებდით”, – წერდა დავით ყიფიანი თავის მოგონებებში.
2011 წელს ისტორიული გამარჯვების 30 წლის თავზე თბილისის “დინამოს” 1981 წლის სრულ შემადგენლობას საქართველოს სპორტისა და ახალგაზრდობის საქმეთა სამინისტრომ სპორტის რაინდის წოდება მიანიჭა.
