ხვალ, საქართველოს ფეხბურთელთა ეროვნული ნაკრები მსოფლიო ჩემპიონატის შესარჩევი ეტაპის დასკვნით მატჩს შვედეთის ნაკრების წინააღმდეგ გამართავს.
შეხვედრის დაწყებამდე 24 საათით ადრე ჩვენი გუნდის ვიცე-კაპიტანმა, გურამ კაშიამ მატჩისწინა ოფიციალური პრესკონფერენცია გამართა და ჟურნალისტების კითხვებს უპასუხა.
„სექტემბერში ძალიან ცუდად ვითამაშეთ და ეს პასუხისმგებლობა ფეხბურთელებმა უნდა ავიღოთ, თუმცა ეს განწყობის ბრალი არ ყოფილა. მიზეზი ისაა, რომ ციკლის დასაწყისთან შედარებით, განსხვავებული შემადგენლობით ვიყავით. ნაკრებში განწყობა ყოველთვის მაღალია და წარუმატებლობას ამას ვერ დავაბრალებთ, რადგან ნაკრებში ფეხბურთელები ყოველთვის ბოლომდე დახარჯვას ვცდილობთ.
რაც შეეხება მაყურებელს, ამ შესარჩევ ციკლში ისე მოხდა, რომ მხოლოდ ესპანეთთან ვითამაშეთ ფანების თანდასწრებით. ამიტომ, ხვალ გულშემატკივრების მხარდაჭერა ძალიან მნიშვნელოვანი იქნება და ვიმედოვნებ, რომ ხვალიდან ბათუმში ქულების მოპოვებასაც დავიწყებთ“, – განაცხადა გურამ კაშიამ.
შეგახსენებთ, რომ საქართველოსა და შვედეთის ნაკრებების შეხვედრა ბათუმი არენაზე 21:00 საათზე დაიწყება. შეხვედრის რეპორტაჟს საზოგადოებრივი მაუწყებელი შემოგთავაზებთ.
