ესპანეთის საფეხბურთო ჩემპიონატში ზედიზედ მეოთხე შეხვედრა ჩაატარა გიორგი მამარდაშვილმა. ქართველი ფეხბურთელის გუნდი ამჯერად „ბარსელონას“ საკუთარ მოედანზე დაუპირისპირდა და სამწუხაროდ უშანსოდ, გამანადგურებელი ანგარიშით – 1:4 დასრულდა.
იმის მიუხედავად, რომ 21 წლის მეკარის კარში 4 გოლი გავიდა, გადაუჭარბებლად შეგვიძლია ვთქვათ, რომ გიორგის ბრალი არც ერთი გოლი არ იყო. ერთადერთი, რომელშიც ოდნავ მაინც შეიძლება მამარდაშვილის დადანაშაულება, ალბათ მეოთხე ბურთია, თუმცა იმის გარდა, რომ პედრიმ საოცრად დაარტყა, ბურთი ობამეიანგსაც შეეხო, რის შემდეგაც დარტყმის ტრაექტორია მცირედით შეიცვალა და საბოლოოდ გოლიც გავიდა.
ყველაზე სამწუხარო ისაა, რომ „ვალენსიას“ დაცვა მიმდინარე სეზონში ძალიან არადამაჯერებლად გამოიყურება, რაც საბოლოო შედეგშიც კარგად ისახება. დღევანდელ შეხვედრაში მამარდაშვილის კარში დუბლი ობამეიანგმა შეასრულა, თითო-თითო გოლი კი ფრენკი დე-იონგმა და პედრიმ გაიტანეს. ვისაც შეხვედრა არ გინახავთ, ვიდეოგამეორებაშიც დარწმუნდებით, რომ მამარდაშვილის ბრალი არცერთი გაშვებული გოლი არ ყოფილა.
იმის მიუხედავად, რომ გიომ 4 ბურთი მიიღო, რამდენიმე ეფექტური სეივიც შემოგვთავაზა, თუმცა მხოლოდ მეორე ტაიმში. პირველ ნახევარში მისი კარისკენ წასული სამივე ბურთი ზუსტი აღმოჩნდა და „ბარსელონამ“ ტაიმი 100%-იანი შედეგით დაასრულა – 3 ზუსტი დარტყმიდან 3 გოლი. „ვალენსიამ“ ქამბექის იმედი მეორე ტაიმის დებიუტშივე, კარლოს სოლეით გოლით ჩასახა, თუმცა ეს იმედი მალევე პედრიმ ბრწყინვალე შორეული გასროლით მოკლა.
25 ტურის შემდეგ „ვალენსიას“ 30 ქულა აქვს და ლა ლიგის სატურნირო ცხრილში მე-12 ადგილს იკავებს. ბორდალასის გუნდი მომდევნო შეხვედრას 26 თებერვალს, „მალიორკას“ წინააღმდეგ სტუმრად გამართავს.
