საქართველოს ძალოსანთა ნაკრებმა უზბეკეთში მიმდინარე მსოფლიოს ჩემპიონატზე პირველი მედალი მოიპოვა.
61 კგ წონით კატეგორიაში ჩვენი ქვეყნის სახელით ორმა სპორტსმენმა – შოთა მიშველიძემ და რამინ შამილიშვილმა იასპარეზეს, საპრიზო ადგილზე გასვლა კი მიშველიძემ შეძლო.
27 წლის ძალოსანმა ატაცში 3-დან 2 ცდა გამოიყენა – 126 და 131 კილოგრამები დაძლია და ჩათვლაში ვერცხლის მედალსაც დაესაკუთრა. ატაცის მსგავსად, შოთამ აკვრაშიც 2 ცდა გამოიყენა და 150 და 155 კილოგრამების დაძლევით, ასევე ვერცხლის მედალი აიღო. ორჭიდის ჯამში მიშველიძემ 286 კილოგრამი დააფიქსირა და მსოფლიოს ვიცე-ჩემპიონობაც იზეიმა. შესაბამისად, ახალგაზრდა ძალოსანმა მსოფლიო პირველობაზე 3 ვერცხლის მედალი აიღო.
