ნაციონალურ საკალათბურთო ასოციაციაში მორიგი შეხვედრა გამართა გოგა ბითაძის „ინდიანა პეისერსმა“ და ზედიზედ მე-6 შეხვედრაში დამარცხდა. ქართველი ცენტრის გუნდი ამჯერად „მინესოტა ტიმბერვულვზს“ დაუპირისპირდა და მატჩი 120:129 დათმო.
გოგამ შეხვედრა კვლავ სასტარტო ხუთეულიდან დაიწყო და მოედანზე არასრული 19 წუთი გაატარა. ქართველმა ცენტრმა ამ დროის განმავლობაში 7 ქულა, 3 მოხსნა, 3 შედეგიანი გადაცემა და 2 დაფარება მოაგროვა. მან 4-დან 3 ორქულიანი და 2-დან ერთი საჯარიმო ჩააგდო. ამასთან, ბურთი ორჯერ დაკარგა და ამდენივე პერსონალური ჯარიმა აიღო.
58 ტურის შემდეგ ინდიანას 19 მოგება და 39 მარცხი აქვს, მომდევნო შეხვედრას კი 16 თებერვალს, „მილოუკ ბაქსის“ წინააღმდეგ გამართავს, სადაც კიდევ ერთი ქართველი, სანდრო მამუკელაშვილი თამაშობს.
