ალბათ გადაუჭარბებლად შეიძლება ითქვას, რომ ევროპა ლიგა უნაი ემერის ტურნირია. ესპანელ სპეციალისტს, რანგით მეორე ევროპული საკლუბო ტურნირი განსაკუთრებით უყვარს, რაც შედეგებშიც თვალნათლივ აისახება.
უნაი ემერი, ევროპა ლიგის ფინალში თავისი სამწვრთნელო კარიერის მანძილზე უკვე მეხუთედ გავიდა. მას თავი იმითაც შეუძლია მოიწონოს, რომ უმეტეს შემთხვევაში თასიც ჩაიხუტა.
ფეხბურთის ქომაგთათვის ალბათ შეხსენება საჭირო არ უნდა იყოს, რომ ემერიმ აღნიშნული ტურნირი სამჯერ „სევილიასთან“ ერთად მოიგო.
საინტერესო და სიმბოლური დამთხვევაა, მაგრამ ევროპა ლიგის ფინალში ის ერთადერთი მარცხიც „არსენალთან“ ერთად განიცადა, როდესაც ბაქოში თანაქალაქელ „ჩელსისთან“ წააგო. მიმდინარე სეზონში კი ემერიმ, სოწრედ მისი ყოფილი გუნდი „არსენალი“ დაიბრიყვა და „ვილიარეალის“ მთავარი მწვრთნელის რანგში, ევროპა ლიგის მოგებას კიდევ ერთხელ შეეცდება.
ნიშანდობლივია, რომ უნაი ემერიმ მწვრთნელებს შორის რეკორდიც დაამყარა. ფინალებს რომ თავი დავანებოთ, ის ევროპა ლიგის ნახევარფინალშიც მეექვსედ იყო გასული. „ვილიარეალის“ და „არსენალის“ გარდა, მას ამ ტურნირის 1/2 ფინალში ერთხელ „ვალენსიაც“ ჰყავდა გაყვანილი.
