ყაზანის რუბინის რუსმა მცველმა გეორგი ზოტოვმა ქართველი თანაგუნდელის ხვიჩა კვარაცხელიას შესახებ ისაუბრა.
“სატრანსფერო ჭორების ზეგავლენა რუბინზე? ეს პრესაში გადაჭარბებულად იყო. ვერ ვიტყვი, რომ ამან გუნდზე ძლიერი ზეგავლენა იქონია, თუმცა, კონკრეტულ ფეხბურთელებზე აუცილებლად აისახებოდა. იგივე ხვიჩა ავიღოთ. მუდმივად წერენ, რომ მისი ტოტენჰემი, იუვენტუსი და სხვები არიან დაინტერესებულნი. შეუძლებელია, ეს ზეწოლას არ ახდენდეს. ყველაფრის მიუხედავად, ბიჭები ვარჯიშებზე თუ თამაშებზე 100%-ით იხარჯებოდნენ. კი, იყო ხვიჩასთან დაკავშირებული ხუმრობები, როდესაც მასზე ლამის ყოველდღე ახალ რამეს წერდნენ. ვეუბნებოდით, რომ მალე კეინთან ერთად ითამაშებდა და მსგავსი რაღაცეები. პირადად, მოხარული ვარ, რომ ასეთი ძლიერი ფეხბურელი გუნდში რჩება. ცხადია, თავად მას უნდა, რომ ძალები ევროპაში გამოსცადოს. თუკი ის ამავე დონეზე თამაშს განაგრძობს, ტოპ-კლუბები ნამდვილად არსად წავლენ. ეს გარდაუვალი ისტორიაა, ვფიქრობ, მას 100%-ით წაიყვანენ”.
ბოლო პერიოდში ხვიჩა კვარაცხელიას ტრანსფერის შესახებ ბევრი იწერებოდა. მას ყველაზე ხშირად “ტოტენჰემსა” და “მილანს” უკავშირებდნენ, თუმცა, სატრანსფერო ფანჯარა ისე დაიხურა, რომ კვარაცხელია არსად გადასულა. ამჟამად, ხვიჩას მცირე ტრავმა აქვს და ვერც საქართველოს ეროვნულ ნაკრებში ჩამოსვლა მოახერხა.
