კვიპროსის ჩემპიონატის მე-8 ტურში “ანორთოსისმა” “ომონია” სტუმრად ნიკა კაჭარავას ერთადერთი გოლით 1:0 დაამარცხა და ორმატჩიანი წარუმატებელი სერია შეწყვიტა.
მატჩის შემდეგ თემურ ქეცბაიამ “ომონიასთან” გამარჯვებაზე კომენტარი გააკეთა.
“ჩემს ფეხბურთელებს გამარჯვებას ვულოცავ. ბოლო დროს ადვილი კვირები არ გვქონია, არ გვქონდა ის შედეგი, რაც გვინდოდა. აქ, ჩემპიონ ომონიასთან თამაში ადვილი არ არის. ახლა ამ ტემპით უნდა გავაგრძელოთ. გვჯერა, რომ კარგი გუნდი და კარგი ფეხბურთელები გვყავს. რამდენიმე თამაში წავაგეთ, მაგრამ არცერთის წაგებას არ ვიმსახურებდით. შეგვეძლო, რომ უფრო მეტი ქულა გვქონოდა. გასულ კვირაში ზოგი ამბობდა, რომ ყველაზე ცუდი მწვრთნელი ვიყავი, დღეს ისინი იტყვიან, რომ საუკეთესო ვარ. ფეხბურთი ასეთია, მოედანზე უნდა გახვიდე და დაამტკიცო ყველაფერი”, – თქვა ქეცბაიამ.
“ანორთოსისს” კვიპროსის ჩემპიონატში 7 მატჩში 9 ქულა აქვს მოპოვებული და მე-6 ადგილზეა.
ქეცბაიას გუნდი მომდევნო ტურში 7 ნოემბერს “პაფოსს დაუპირისპირდება.
