შვედეთისა და საქართველოს ნაკრებების შეხვედრის შემდეგ, სკანდინავიელთა მთავარმა მწვრთნელმა განვლილი მატჩი შეაფასა. იანე ანდერსონის სიტყვებს საზოგადოებრივი მაუწყებელი ავრცელებს.
„მიუხედავად გამარჯვებისა, თამაშის თვალსაზრისით, დღეს სასიხარულო არაფერი იყო. ფეხბურთელების ძალისხმევით მე იმედგაცრუებული დავრჩი. ბევრი რამ არის, რაც არ მომეწონა. ძალიან ცუდად ვმოძრაობდით. რა თქმა უნდა, ბედნიერები არ ვართ. შეხვედრის ბოლოს მეკარე ნორდფელდტმა გადაგვარჩინა. ამ დროს საკმაოდ ავნერვიულდი. მეორე ტაიმი არასასიამოვნო იყო. უხერხულობა ის არის, რომ ზოგჯერ შეიძლება ანგარიში 1:0 წაიყვანოთ და იგრძნოთ, რომ ყველაფერი თქვენს ხელშია, არ არის ასე. დღეს ჩვენ დამაჯერებელ მოგებას ვერ მივაღწიეთ. ეს უსიამოვნო გრძნობა იყო“, – განაცხადა ანდერსონმა.
შეგახსენებთ, რომ 2022 წლის მსოფლიო ჩემპიონატის შესარჩევი ეტაპის საწყის მატჩში შვედეთის ნაკრებმა საქართველო საკუთარ მოედანზე მინიმალური სხვაობით, 1:0 დაამარცხა. ქართველი ფეხბურთელები მომდევნო შეხვედრას 28 მარტს, „დინამო არენაზე“ ესპანეთის ნაკრების წინააღმდეგ გამართავენ. მატჩი 20:00 საათზე დაიწყება.
