წითელმა ეშმაკებმა ლიდერობა დათმეს. თან სატურნირო ცხრილში პირველი ადგილი მოსისხლე მტერს, „მანჩესტერ სიტის“ გადაულოცეს. ყოველივე ეს კი „ოლდ ტრაფორდზე“ „შეფილდთან“ მოულოდნელმა მარცხმა გამოიწვია. სულშერი შეგირდები მეტოქეს 1:2 დაეჩაგვრინნენ.
ბუნებრივია, მატჩის შემდეგ გულდაწყვეტილი იყო თავად ნორვეგიელი სპეციალისტი, რომელმაც კბილი მსაჯებსაც გაჰკრა.
„ბურთს კარგად ვაკონტროლებდით, ამ მხრივ პრობლემა არ გვქონდა, მაგრამ სათანადო რაოდენობის მომენტები მაინც ვერ შევქმენით. თან, როდესაც ორ დასანან გოლს გაუშვებ, შემდეგ რთულია გადაეწყო.
მეტოქე თავს კარგად იცავდა. ისეთი შთაბეჭდილება იქმნებოდა, რომ ჩვენ ზებუნებრივი ძალების დახმარებაც გვჭირდებოდა.
არბიტრებზე საუბარი არ მიყვარს, მაგრამ დღეს მათ ორი უხეში შეცდომა დაუშვეს, რამაც შედეგზე პირდაპირი გავლენა მოახდინა. პირველი გაშვებული გოლის ეპიზოდში, დე ხეას წინააღმდეგ აშკარა უხეშობას ჰქონდა ადგილი, შემდეგ კი ჩვენ არ ჩაგვითვალეს სუფთა გოლი. ვერაფერს ვიზამთ. ასეთია ეს სეზონი, სადაც უკვე არაერთი მოულოდნელი შედეგი დაფიქსირდა.
მარცხი ყოველთვის ცუდია, მაგრამ ამ წაგებას არ გადავყვებით. მიმდინარე სეზონში ყველა გრძნობს, რომ სტაბილურობით გამოვირჩევით. დღეს არ გაგვიმართლა, მაგრამ წინ ბევრი მატჩია“ – თქვა ჟურნალისტებთან ოლე გუნარ სულშერმა.
