26 წლის რუსი ჩოგბურთელისთვის, იანა სიზიკოვასთვის 2021 წლის როლან გაროსი საბედისწერო აღმოჩნდა. გუშინ, საფრანგეთის პოლიციამ ჩოგბურთელი პირდაპირ შეხვედრის დასრულების შემდეგ აიყვანა. ინფორმაციას Le Parisien ავრცელებს.
გამოცემის ცნობით, სიზიკოვამ როლან გაროსზე პირველი წრის მატჩი განგებ წააგო და მისი დაკავების მიზეზიც სწორედ ეს გახდა. დაპატიმრებიდან რამდენიმე წუთში სამართალდამცველებმა 26 წლის ჩოგბურთელის სასტუმრო ნომერიც გაჩხრიკეს. სიზიკოვას ATP-ის ანტიკორუფციული დეპარტამენტი თამაშების გარიგებას ედავება.
როგორც Le Parisien აღნიშნავს, ბროკერულმა კომპანიებმა რუმინელი სპორტსმენების გამარჯვებაზე რამდენიმე ათეული ათასი ევრო დადეს.
რუსი ჩოგბურთელი თამაშების ჩაწყობაში ეჭვმიტანილი გასული წლის ოქტომბერშიც იყო. მაშინ პოლიციამ სიზიკოვას ბრალი დასდო, რომ ამერიკელ მედისონ ბრენგლთან ერთად წყვილში თამაშის დროს გამიზნულად წააგო რუმინულ დუეტთან. მაშინდელ ამბებზე გამოძიება ამ დრომდე მიმდინარეობს.
