ძალოსანთა ევროპის ჩემპიონატზე საქართველოს ნაკრება ორჭიდის ჯამში პირველი მედალი მოიპოვა. 61კგ წონით კატეგორიაში შოთა მიშველიძე ვერცხლის მედლის მფლობელი გახდა.
26 წლის სპორტსმენმა ატაცში 135, აკვრაში 155, ორჭიდის ჯამში კი 290კგ დააფიქსირა და საერთო ჩათვლაში მეორე ადგილი დაიკავა.
აკვრაში ქართველმა ძალოსანმა პირველი მისვლა (155კგ) წარმატებით დაძლია, მეორე მისვლაში 159კგ-ს შეეჭიდა თუმცა ხელის ტრავმის გამო აწევა ვეღარ შეძლო. წარუმატებელი გამოდგა მესამე ცდაც, რომელიც ორჭიდის ჯამში ოქროს მედლის ბედს წყვეტდა. ამ ეპიზოდში შოთიკო მძიმე ტრავმას გადაურჩა. მას სამედიცინო დახმარება აღმოუჩინეს და საბედნიეროდ სერიოზული დაზიანება არ აღენიშნა.
შოთიკო მიშველიძის გარდა 61კგ წონით კატეგორიაში კიდევ ერთი ქართველი ძალოსანი, როინ შამელიშვილი გამოდიოდა, რომელმაც ატაცში 124კგ, აკვრაში კი 155კგ ასწია და ორჭიდის ჯამში მერვე ადგილი დაიკავა.
