ხვალ საქართველოს ფეხბურთელთა ნაკრები ამხანაგურ შეხვედრაში ნიდერლანდების ნაკრებს დაუპირისპირდება. ჩვენი გუნდი ნიდერლანდების ქალაქ ენსხედეში იმყოფება და მატჩისთვის ადგილიდან ემზადება.
ვილი სანიოლის გუნდმა გუშინ ენსხედეს სტადიონზე ივარჯიშა, რომლის დასრულების შემდეგაც ჩვენი ნაკრების ნახევარმცველმა, ოთარ კიტეიშვილმა მოსამზადებელ ეტაპზე და მეტოქეზე მცირე კომენტარი გააკეთა:
„ეროვნულ ნაკრებში გამარჯვება ყოველთვის სასიამოვნოა, არ აქვს მნიშვნელობა ეს მატჩი ამხანაგურია თუ ოფიციალური. რუმინეთთან მოპოვებულ გამარჯვებას ძალიან დადებითი ემოციები მოყვა. ბოლო წუთამდე დაძაბული შეხვედრა გამოდგა. შესაძლოა ჩვენი საუკეთესო თამაში არ გვიჩვენებია, მაგრამ გამარჯვება მოვახერხეთ და დაშვებული შეცდომები აუცილებლად უნდა გამოვასწოროთ.
რაც შეეხება ნიდერლანდებთან თამაშს, ვფიქრობ, რომ მსოფლიოსა და ევროპის ერთ-ერთი საუკეთესო ნაკრებია. საკმაოდ დიდი მოსამზადებელი პერიოდი გავიარეთ და ასეთი დონის მეტოქესთან თამაში ძალიან სასიამოვნოა. ვეცდებით, რომ მაქსიმალურად დავიხარჯოთ, ფეხბურთი ვითამაშოთ და დადებითი შედეგი დავაფიქსიროთ“, – განაცხადა კიტეიშვილმა.
შეგახსენებთ, რომ ნიდერლანდებისა და საქართველოს ეროვნულ ნაკრებებს შორის ამხანაგური შეხვედრა 6 ივნისს, თბილისის დროით 20:00 საათზე გაიმართება.
