ეროვნული ლიგის მე-14 ტური ბათუმში, ადგილობრივი „დინამოსა“ და „საბურთალოს“ მატჩით დასრულდა. შეხვედრა, რომელიც მსაჯების შეცდომების გამო საკმაოდ დაძაბული გამოდგა ბათუმელების გამარჯვებით, 4:1 დასრულდა.
მატჩის მთავარმა არბიტრმა, გიორგი ყრუაშვილმა მიუტევებელი შეცდომა შეხვედრის დებიუტშივე დაუშვა. მე-6 წუთზე, „დინამოს“ თავდამსხმელის, ლაშა შინდაგორიძის შორეული გასროლის შემდეგ ბურთი ხარიხას მოხვდა, ძელიდან ასხლეტილი ბურთი კი კარის ხაზთან დაეცა, ოღონდ არა საგოლე ზონაში, თუმცა ყრუაშვილმა ეპიზოდი გოლად მიიჩნია და მისი გადაწყვეტილებით შეხვედრაში ბათუმელები დაწინაურდნენ.
თბილისელმა ფეხბურთელებმა წონასწორობის აღდგენა პირველი ტაიმის მიწურულს მოახერხეს. ფლანგიდან გიორგი გოჩოლეიშვილის ჩაწოდებულ ბურთს საჯარიმოში ზუსტად გიორგი კოხრეიძე გამოეხმაურა და ანგარიში გაათანაბრა.
მეორე და ალბათ გადამწყვეტი შეცდომა მთავარმა მსაჯმა მეორე ნახევარში, 57-ე წუთზე დაუშვა. ბათუმელთა ერთ-ერთი იერიშის დროს ყრუაშვილმა გოჩოლეიშვილზე ხელით თამაში დააფიქსირა, არა და გამეორებაზე აშკარად ჩანდა, რომ ახალგაზრდა ფეხბურთელს ხელი სხეულზე ჰქონდა მიდებული და როგორც წესი, ასეთ დროს მსაჯები წესების დარღვევას არ აფიქსირებენ. აღნიშნული ჯარიმის გათმაშების შემდეგ კი საჯარიმოში, ცოცხალ კედელში მდგარ კოხრეიძეს ბურთი აშკარად ხელზე მოხვდა და ყრუაშვილმაც თერთმეტმეტრიანის ნიშნულისკენ მიუთითა. პენალტი ობიექტური გადაწყვეტილება იყო, მაგრამ რომ არა გოჩოლეიშვილზე დაფიქსირებული შეცდომა, კაცმა არ იცის როგორ დასრულდებოდა ეს ეპიზოდი. საბოლოოდ, თერთმეტმეტრიანი ვლადიმერ მამუჩაშვილმა ზუსტად გამოიყენა და „დინამო ბათუმი“ წინ გაიყვანა.
დარჩენილ დროში „საბურთალოს“ ფეხბურთელებმა ძალების მობილიზება ვეღარ შეძლეს და ფსიქოლოგიურადაც აშკარად გატყდნენ. ამით ბრწყინვალედ ისარგებლა ბათუმურმა კლუბმა და მეტოქეს კიდევ ორი გოლი გაუტანა. 73-ე წუთზე თავი ჯერ გიორგი ფანცულაიამ გამოიჩინა, ზუსტად 5 წუთში კი გიული მანჯგალაძემ საბოლოო ანგარიში, 4:1 დააფიქსირა.
14 ტურის შემდეგ, ბათუმის „დინამო“ და თბილისის „დინამო“ 31-31 ქულით პირველ-მეორე ადგილს ინაწილებენ.
დაბოლოს ისიც დავძინოთ, რომ აღნიშნულ დაპირისპირებას ბათუმის ახალ სტადიონზე ეროვნული ნაკრების მწვრთნელი ვილი სანიოლიც ესწრებოდა.
