არავინ იცის სად გააგრძელებს კარიერას ხვიჩა კვარაცხელია. ისიც არ გამოვრიცხოთ, რომ ქართველი ფეხბურთელი მინიმუმ ერთი სეზონით კლვავ „რუბინში“ დარჩეს.
მოკლედ, ზაფხულის სატრანსფერო ფანჯარა მალე გაიხსნება და კვარაცხელიასთან დაკავშირებით ბევრ რამეს ნათელიც მოეფინება. მანამდე კი ესპანური მედია მეტად საინტერესო ინფორმაციას ავრცელებს.
კერძოდ, სააგენტო fichajes.net წერს, რომ ხვიჩა კვარაცხელიას „სევილია“ აკვირდება და გუნდის სპორტული დირექტორი მონჩი ყაზანურ გუნდთან კონტაქტზეც გავიდაო.
„ბოლო პერიოდში სევილია ახალგაზრდა და ნიჭიერი ქართველი ფეხბურთელით დაინტერესდა და მას ხშირად აკვირდება. სევილიელებმა კვარაცხელია პირველად ესპანეთთან მატჩის დროს ნახეს და მისით მოხიბლულნიც დარჩნენ. კვარაცხელიამ მართლაც დიდებულად ითამაშა და გოლიც გაიტანა.
საქმე ალბათ იქამდე მივა, რომ სევილიური გუნდის ხელმძღვანელობა რუბინის ბოსებს დაუკავშირდება. უფრო სწორად, სპორტული დირექტორი მონჩი რუსულ კლუბთან უკვე კონტაქტზე გავიდა და 20 წლის ფეხბურთელთან დაკავშირებით მოლაპარაკებები დაიწყო. სულაც არ არის გამორიცხული, უფრო მეტიც დიდი შანსია, რომ მოლაპარაკებები წარმატებით დასრულდეს და მომავალი სეზონიდან კვარაცხელიამ სევილიური გუნდის მაისური მოირგოს“ – წერს აღნიშნული გამოცემა.
ხვიჩა კვარაცხელიას სავარაუდო სატრანსფერო თანხა 20 მილიონი ევროა.
