მოახლოვდა სანაკრებო მატჩებიც, ოღონდ ამჯერად არა მსოფლიო ჩემპიონატის შესარჩევი ციკლის, არამედ ამხანაგური შეხვედრები. ჯვაროსნები, 2 და 6 ივნისს, შესაბამისად რუმინეთის და ნიდერლანდების გუნდებს სტუმრად გაეჯიბრებიან და იმედია სასურველ შედეგსაც მიაღწევენ.
ეროვნული ნაკრების მთავარმა მწვრთნელმა ვილი სანიოლიმ აღნიშნული დაპირისპირებებისთვის 26 ფეხბურთელი გამოიძახა. საქართველოს ნაკრები ივნისის მნიშვნელოვანი მატჩებისთვის 31 მაისამდე თბილისში მოემზადება, შემდეგ კი გეზს როგორც უკვე ვთქვით ჯერ რუმინეთისკენ, შემდეგ კი ბენილუქსისკენ აიღებს.
ჯვაროსნების ფრანგმა თავკაცმა ეროვნული ლიგიდან კიდევ ერთ დებიუტანტს უხმო. 26 კაციან განაცხადში არის ახალგაზრდა ფორვარდი სერგო კუხიანიძე, რომელიც „სამგურალის“ რიგებში თამაშობს და წყალტუბოელთა მაისურით უკვე 5 გოლის გატანაც მოასწრო.
„პრაიმსპორტი“ ეროვნული ნაკრების დებიუტანტს, სერგო კუხიანიძეს დაუკავშირდა და მასთან მცირე ინტერვიუ ჩაწერა.
-როდესაც გავიგე, რომ ნაკრებში გამომიძახეს სიხარულისგან სად წავსულიყავი და რა გამეკეთებინა აღარ ვიცოდი. ეროვნული გუნდის მაისურის მორგება ხომ ნებისმიერი ფეხბურთელის ოცნება და მიზანია. ნაკრები მწვერვალია, რომლისკენაც ყველა ფეხბურთელი მიილტვის – გვითხრა სერგო კუხიანიძემ, როდესაც მას შევეხმიანეთ და კომენტარი ვთხოვეთ.
-გულწრფელად გვითხარით, ელოდით ნაკრებში გამოძახებას?
-სიმართლეს გეტყვით – არა. ამ ეტაპზე არ მეგონა თუ ვილი სანიოლის ყურადღებას დავიმსახურებდი. ამიტომაც ორმაგად გამიხარდა. ყურებს არ ვუჯერებდი და თვალზე ცრემლი მომადგა, როდესაც 26 კაციან განაცხადში მოვხვდი. საკუთარი გვარის ამოკითხვა ძალზედ ემოციური იყო ჩემთვის.
-მაინც როგორ ფიქრობთ, ნაკრების სამწვრთნელო შტაბმა თქვენზე ყურადღება რატომ შეაჩერა?
-ეროვნული ჩემპიონატის დონე ისეთი დაბალი აღარ არის, როგორც ადრე იყო. აქამდე, ეროვნული ლიგიდან ნაკრებში მოხვედრის შანსი პრაქტიკულად არ არსებობდა ან მცირე იყო. არა, ახლაც უმთავრესად ლეგიონერებზე ვართ დაყრდნობილი, თუმცა შიდა ჩემპიონატში მოთამაშე ფეხბურთელებსაც მეტი ყურადღება ექცევა.
კონკრეტული პასუხი თუ რატომ შეაჩერეს არჩევანი ჩემზე გამიჭირდება, თუმცა მაქსიმუმს გავიღებ, რათა ვილი სანიოლის და გულშემატკივართა იმედები გავამართლო.
-ეროვნული ლიგის მიმდინარე გათამაშებაში უკვე 5 გოლი გაიტანეთ…
-დიახ და ალბათ ერთ-ერთი მიზეზი ესეც იყო, რომ ნაკრებში მიხმეს. ახლა ყველაფერი ჩემზეა დამოკიდებული თუ ვარჯიშებზე როგორ წარმოვაჩენ თავს.
-რა მოლოდინი გაქვთ? მოგეცემათ მოედანზე გასვლის შანსი?
-უიმედოდ ნამდვილდ არ ვარ, თუმცა როგორც უკვე ვთქვი ახლა უკვე ყველაფერი ჩემზეა დამოკიდებული. ნაკრებში თუ გამოგიძახეს, მაშინ ყოველწამს უნდა ელოდო, რომ მოედანზეც შეხვალ.
