მსოფლიო ფეხბურთის მმართველმა ორგანომ (FIFA) მიმდინარე წლის ბოლო რეიტინგი გამოაქვეყნა.
ბუნებრივია, ქართველი გულშემატკივრებისთვის ყველაზე საინტერესო საქართველოს ნაკრების პოზიციია. ვინაიდან, ჩვენს გუნდს დეკემბერში სანაკრებო თამაში არ ჩაუტარებია, ადგილები ნოემბრის თვით გადანაწილდა.
საბოლოოდ, ქართველები წელს 89-ე საფეხურზე ასრულებენ, არა და ნოემბრის შეხვედრებში გამარჯვების შემთხვევაში, სავარაუდოდ, საუკეთესო 80 გუნდს შორის მოვხვდებოდით, რაც დამოუკიდებელი საქართველოს ისტორიაში საუკეთესო მაჩვენებელი იქნებოდა.
ჩვენმა გუნდმა ნოემბერში სამი საშინაო შეხვედრა გამართა და ორ მატჩში დამარცხდა (ჩრდ. მაკედონია 1:2; სომხეთი 1:2), მესამეში კი ფრედ, 0:0 ითამაშა (ესტონეთი).
რაც შეეხება ლიდერებს, პირველ პოზიციაზე კვლავ ბელგიის ნაკრებია. მის შემდეგ, მეორე ადგილს საფრანგეთის, მესამე ადგილს კი ბრაზილიის ნაკრები იკავებს.
2021 წელს საქართველოს ნაკრები მსოფლიოს ჩემპიონატის შესარჩევ ეტაპში ჩაერთვება. ჩვენი გუნდის მეტოქეები ესპანეთის, შვედეთის, საბერძნეთის და კოსოვოს ნაკრებები იქნებიან. ეროვნული ნაკრები საკვალიფიკაციო ეტაპის პირველ შეხვედრას 25 მარტს, სტუმრად შვედეთის ნაკრების წინააღმდეგ გამართავს.
