გუშინ, გიორგი მამარდაშვილის „ვალენსია“ ესპანეთის საფეხბურთო ჩემპიონატის მორიგ ტურში „ალავესს“ ესტუმრა და დაძაბულ ბრძოლაში 2:1 დამარცხდა.
ქართველი მეკარე „ღამურების“ სასტარტო შემადგენლობაში ზედიზედ მეორედ მოხვდა და ამჯერად მეტოქისგან ორი გოლი გაუშვა, თუმცა მისი დადანაშაულება არც ერთ ეპიზოდში არ შეიძლება. პირველი გოლის დროს მამარდაშვილმა ურთულესი ბურთი მოიგერია, თუმცა დამატებაზე ალავესის ფეხბურთელმა ყველას აჯობა, მეორე გოლის ეპიზოდში კი ხოსელუს თერთმეტმეტრიანის დარტყმის კუთხე ვერ გამოუცნო და საპირისპირო მხარეს გადახტა.
შესაბამისად, „ვალენსიამ“ ქულები კვლავ დაკარგა და ამასთან, ზედიზედ მესამე საგარეო შეხვედრა წააგო. ხოსე ბორდალასის გუნდი 24 ტურის შემდეგ, სატურნირო ცხრილში 30 ქულით მე-12 ადგილზე იმყოფება.
შეხვედრის დასრულების შემდეგ ავტორიტეულმა ესპანურმა გამოცემებმა „ვალენსიას“ თამაში განიხილეს და ყურადღება გიორგი მამარდაშვილის თამაშზეც გაამახვილეს. გთავაზობთ მცირე ამონარიდს რამდენიმე სააგენტოდან:
AS – ქართველმა გამორჩეული მატჩი ჩაატარა. დასაწყისში ლუმის წინააღმდეგ კარგი სეივი ჰქონდა. გუნდი ესკალანტეს დარტყმის შემდეგაც იხსნა, მაგრამ ერთი წამის შემდეგ ლუმის გოლისგან ვერ გადაარჩინა. შემდეგ მან დუარტეს დარტყმაც მოიგერია. მე-2 ტაიმში ალავესს პენალტის გარდა კარში აღარ დაურტყამს.
Plazadeportiva – სამწუხაროა, რომ ალავესთან შეხვედრაში ვალენსიას მხრიდან საუკეთესო მხოლოდ გიორგი მამარდაშვილი იყო. გაშვებული გოლებისას ყველაზე ნაკლებად დამნაშავე ის გახლდათ, მას არაფრის გაკეთება შეეძლო. ამასთან, რამდენიმე კარგი ბურთიც მოიგერია და გუნდი გაშვებულ გოლს გადაარჩინა.
ცნობისთვის, მატჩის დასრულების შემდეგ გამოქვეყნებულ ფეხბურთელთა შეფასებებში, „ვალენსიას“ მხრიდან საუკეთესო ქულები გიორგი მამარდაშვილმა დაიმსახურა – 6.6 ქულა.
