ტოკიოში მიმდინარე პარალიმპიურ თამაშებზე საქართველოს დელეგაციამ ერთი მედალი უკვე მოიპოვა. გუშინ, ეტლით მოფარიკავე ნინა თიბილაშილმა ფინალში გასვლა მოახერხა, თუმცა ოქროს მედლისთვის ბრძოლაში დამარცხდა და საბოლოოდ ვერცხლის მედალს დასჯერდა. საქართველოს ისტორიაში ნინა პირველი ქალი პარასპორტსმენია, რომელმაც საქართველოს პარალიმპიურ თამაშებზე მედალი მოუტანა.
დღევანდელ საშეჯიბრო დღეს საქართველოდან არავის უასპარეზია, თუმცა ჩვენი პარასპორტსმენები ძალებს ხვალ მოსინჯავენ. 27 აგვისტოს გათამაშებაში პარაძიუდოისტები – გიორგი გამჯაშვილი (-66კგ) და ზურაბ ზურაბიანი (-60კგ) ჩაერთვებიან.
ზურაბიანი საწყის შეხვედრაში მონღოლ იადამდორგ სუხბაატარს შეხვდება. გამარჯვების შემთხვევაში ქართველი პარაძიუდოისტი მეოთხედფინალში ყაზახ ანუარ სარიევს დაუპრიისპრიდება.
გიორგი გამჯაშვილი კი ტურნრირზე მეოთხედფინალიდან ჩაერთვება, სადაც ამერიკელი რობერტ ტანაკასა და რუსეთის პარალიმპიური კომიტეტის წარმომადგენლის, ვიქტორ რუდენკოს შორის გამარჯვებულს დაეჭიდება.
საკვალიფიკაციო ასპარეზობა თბილისის დროით 05:30 საათიდან დაიწყება, ფინალური ბლოკი კი 11:00 საათიდან გაიმართება.
