სამგურალმა სამტრედია დიდი ანგარიშით დაამარცხა

ეროვნული ლიგის 24-ე ტურის მატჩში წყალტუბოს “სამგურალმა” შინ ტურნირის აუტსაიდერ “სამტრედიას” უმასპინძლა და დიდი სხვაობით 4:0 დაამარცხა.

სოსო ფრუიძის გუნდმა უპირატესობა მალევე მოიპოვა და შეხვედრის მე-7 წუთზე ალექსანდრე ვერულიძემ წყალტუბოელები დააწინაურა. 25-ე წუთზე ალექსანდრე ვერულიძის პასს პაპუნა ფონიავა გამოეხმაურა და სხვაობა ორამდე გაზარდა. 37-ე წუთზე კი საქმეში გუნდის ბომბარდირი სერგი კუხიანიძე ჩაერთო, ახალგაზრდა ფეხბურთელმა თავისი გუნდის უპირატესობა 3-მდე გაზარდა.

მეორე ტაიმში “სამგურალმა” კვლავ შეუტია და ახლად შემოსულმა ირაკლი ლექვთაძემ 71-ე წუთზე თავის გუნდს პენალტი გამოუმუშავა, თერთმეტმეტრიანი ნიშნულიდან კი სერგი კუხიანიძემ თავისი შანსი გამოიყენა და მატჩის საბოლოო ანგარიში დააფიქსირა.

24 ტურის შემდეგ, სოსო ფრუიძის გუნდი მე-6 ადგილს იკავებს, სამტრედია კი 14 ქულით ბოლო ადგილზეა.

გია ცეცაძის გუნდი მომდევნო ტურის მატჩში შინ ქუთაისის “ტორპედოს” უნასპინძლებს, “სამგურალი” კი თბილისში “ლოკომოტივს” ესტუმრება.