საქართველოს დავით ყიფიანის სახელობის თასის გათამაშების 1/8 ფინალში, ალბათ ყველაზე საინტერესო წყვილი „საბურთალომ“ და „დილამ“ შეადგინეს.
თბილისელებიც და გორელებიც უმაღლესლიგელები არიან და გულშემატკივარიც დაძაბული მატჩის მოლოდინში იყო. შანსები ორივე გუნდს თანაბრად ჰქონდა და რთული იყო რომელიმე მათგანი ფავორიტად დაგვესახელებინა.
„საბურთალომ“ ეროვნული ლიგის გათამაშებაში ბათუმში განცდილი მარცხის შემდეგ, რეაბილიტაცია თასზე მოახდინა და მეტოქეს დამაჯერებლად – 3:1 აჯობა.
ხვიჩა შუბითიძის შეგირდთაგან თავი პირველ ტაიმში დაჩი ცნობილაძემ, ხოლო მეორე ნახევარში იური ტაბატაძემ და ნიკა მალიმ გამოიჩინეს და მატჩის ბედიც აქ გადაწყდა. გორელებმა მხოლოს ის შეძლეს, რომ მატჩის მიწურულს პრესტიჟის გოლი გაეტანა, რომელიც „დილას“ გვინეელმა ლეგონერმა უსმან კამარამ შეაგდო.
ამრიგად, თბილისის „საბურთალო“ საქართველოს თასის მეოთხედფინალში დამაჯერებლად და დამსახურებულად გავიდა.
