საქართველოს თასის ფინალში სამგრურალის მეტოქე გაირკვა

საქართველოს თასის ნახევარფინალში “საბურთალომ” “დინამო ბათუმი” 2:1 დაამარცხა და ფინალში გავიდა, სადაც წყალტუბოს “სამგურალს” დაუპირისპირდება.

შეხვედრის დაწყების წინ გუნდებმა წუთიერი დუმილით პატივი მიაგეს საფეხბურთო კლუბ “ზესტაფონის” დამფუძნებლისა და პრეზიდენტის ილია კოკაიას ხსოვნას, რომელიც 23 ნოემბერს ტრაგიკულად დაიღუპა.

თამაშის პირველ ათ წუთში ბათუმელები დომინირებდნენ, მაგრამ შემდეგ თბილისელები გააქტიურდნენ და რამდენიმე რეალური საგოლე მომენტი შექმნეს. 33-ე წუთზე მარჯვენა ფრთიდან საჯარიმოში ჩაწოდებული ბურთი მამუკა კობახიძემ ძალიან ცუდად მოიგერია, ამით მანდრიჩენკომ ისარგებლა და “საბურთალო” დააწინაურა.

“საბურთალოს” ანგარიშის გაზრდის შესაძლებლობა კიდევ ორჯერ ჰქონდა, მაგრამ გასატანად ძალიან ცოტა დააკლდა.

მეორე ტაიმის დასაწყისშივე შოთა ნონიკაშვილმა საჯარიმოს გარედან ულამაზესი გოლი გაიტანა და სხვაობა ორამდე გაზარდა. მთელი თამაში თბილისელთა უპირატესობით მიმდინარეობდა. “დინამოელები” მეტოქის ნახევარზე გადასვლას ვერ ახერხებდნენ და საერთოდ კარშიც ვერ ურტყამდნენ.

ტაიმის მიწურულს გიორგი ნიქაბაძის წაქცევისთვის დანიშნული 11-მეტრიანი ვლადიმერ მამუჩაშვილმა გაიტანა და მატჩში ინტრიგა ისევ დატოვა.

ბათუმელებმა ბოლო წუთები იერიშებში გაატარეს, მაგრამ ანგარიში აღარ შეცვლილა და  “საბურთალო” ისტორიაში მეორედ საქართველოს თასის ფინალში ითამაშებს.