როტედრამში დასრულდა ტოკიოს ზაფხულის ოლიმპიური თამაშების სალიცენზიო ტურნირი წყალბურთში, რომელშიც საქართველოს ნაკრებიც მონაწილეობდა, თუმცა სანუკვარ მიზანს ვერ მიაღწია და საბოლოოდ ტურნირი მეშვიდე ადგილზე დაასრულა.
იაპონიის დედაქალაქში მიმავალ მატარებელზე როტერდამში შეკრებილი 12 გუნდიდან მხოლოდ 3 შეხტებოდა და პრინციპში შეიძლება ითქვას, რომ ტურნირი ყოველგვარი სენსაციების გარეშე ჩათამაშდა. ტოკიოს საგზურები იმ სამმა ნაკრებმა მოიპოვა, რომლებიც იმთავითვე ფავორიტებად მოიაზრებოდნენ.
მესამე ადგილისთვის დაპირისპირება, ისევე როგორც ფინალი დრამატული გამოდგა. ჩემპიონობას ჩვენ ჯგუფში მყოფი საბერძნეთის და მონტენეგროს გუნდები ეცილებოდნენ. მატჩი მონტენეგროელთა მინიმალური გამარჯვებით 10:9 დასრულდა, თუმცა ლიცენზია წაგებულ ელადელებსაც ერგოთ.
აი, გაცილებით დიდი ინტრიგა ჰქონდა ხორვატიასა და რუსეთს შორის მესამე ადგილისთვის ჯახს, რომელში წაგებულიც ლიცენზიის გარეშე რჩებოდა. შეგახსენებთ, ეს ორი გუნდი ერთმანეთს ჯგუფურ ეტაპზეც დაუპირისპირდნენ და მაშინ რუსთა გამარჯვება (14:13) სპეციალისტებმა სენსაციად მონათლეს.
ხორვატებმა რევანში გაცილებით მნიშვნელოვან დროს აიღეს, როდესაც სასწორზე ტოკიოს ლიცენზია იდო. მატჩი ფრედ 11:11 დასრულდა, ხოლო პენალტების სერიაში უკეთესები ხორვატები აღმოჩნდნენ.
ამრიგად „ტოკიო 2020“ ლიცენზიები მონტენეგროს, საბერძნეთის და ხორვატიის გუნდებმა მოიპოვეს, ხოლო რუსეთი ტოკიოს მიღმა დარჩა.
