ბექა მიქელთაძემ ვოლგოგრადის „როტორი“ დატოვა. ინფორმაციას რუსული კლუბის ოფიციალური ვებ-გვერდი ავრცელებს.
„როტორის“ ცნობით, მათსა და ქართველ ფეხბურთელს შორის არსებული კონტრაქტი ვადაზე ადრე შეწყდა, შესაბამისად 23 წლის ფეხბურთელს ახალი კლუბის პოვნა მოუწევს.
„ბექა მიქელთაძე „როტორიდან“ მიდის. ორმხრივი შეთანხმებით, ფეხბურთელთან თანამშრომლობა დროზე ადრე შეწყდა. თავდამსხმელი ვოლგოგრადულ კლუბში 2020 წლის თებერვალში გადმოვიდა. მთელი კლუბი მადლობას უხდის ბექა გაწეული სამუშაოსთვის და სამომავლოდ წარმატებებს ვუსურვებთ“, – წერია „როტორის“ განცხადებაში.
ბექა მიქელთაძემ რუსულ კლუბში 2020 წლის თებერვლიდან მოყოლებული 14 მატჩი ჩაატარა, თუმცა გოლის გატანა ვერ მოახერხა.
