თბილისის დინამოს პრეზიდენტი, რომან ფიფია თბილისური კლუბის ჩემპიონობას ეხმაურება. მისალოცი წერილი, დინამოს Facebook-გვერდზე გამოქვეყნდა.
„წელს განსაკუთრებულად რთული სეზონი გამოდგა, რასაც კოვიდ პანდემიით გამოწვეული პრობლემებიც დაერთო, თუმცა ერთად დგომით დაწყებული საქმე ბოლომდე მივიყვანეთ და კიდევ ერთხელ დავამტკიცეთ, რომ დინამო თბილისი საქართველოს საუკეთესო კლუბია. იყო ბევრი პრობლემა, რასაც ევროთასზე განცდილი ფიასკოც დაემატა. ამ ყველაფერს ჩვენი გუნდი ბოლომდე აანალიზებს და ჩემი მხრიდან დარწმუნებით შემიძლია გითხრათ, რომ მომავალი სეზონისთვის დინამო უფრო ძლიერი დაბრუნდება და აუცილებლად გავახარებთ ჩვენს გულშემატკივარს. მინდა ყველას მადლობა ვუთხრა დღევანდელი შედეგისთვის, გაზონის მომვლელიდან დაწყებული სამწვრთნელო შტაბით დამთავრებული. ერთად ყოფნით ჩვენ უფრო მეტს მივაღწევთ. განსაკუთრებული მადლობა ჩვენს ერთგულ გულშემატკივარს, რომელიც ყოველთვის ჩვენს გვერდითაა და ეს გამარჯვება პირველ რიგში მათ ეძღვნებათ. მადლობა გუნდის თითოეულ ფეხბურთელს, რომელმაც ბოლომდე ირწმუნა საკუთარი შესაძლებლობების და დღევანდელ ტრიუმფამდე მოვიდა. დინამო თბილისი ჩემპიონია!“ – განაცხადა ფიფიამ.
2019/20 წლების სეზონში დინამომ საერთო ჯამში 40 ქულა დააგროვა და სატურნირო ცხრილში პირველი ადგილი დაიკავა. მისი უახლოესი მდევარი ბათუმის დინამო იყო, რომელმაც სეზონი 36 ქულით დაასრულა.
დასკვნით მატჩში თბილისელებმა დინამო არენაზე მერანი 3:0 დაამარცხეს და არსებობის ისტორიაში, საქართველოს ჩემპიონის ტიტული მე-18 მოიპოვეს.
თბილისური გუნდი საქართველოს ჩემპიონთა ლიგის საკვალიფიკაციო ეტაპზე წარადგენს, სადაც რამდენიმე თვის წინ, ფარერების ჩემპიონ კლაკსვიკთან სამარცხვინოდ, 6:1 დამარცხდა.
იმედია მომავალ სეზონში დინამოელები ბევრად წარმატებულად გამოვლენ და ქართველ გულშემატკივარს იმედს აღარ გაუცრუებენ.
