UFC-ს ქართველი მებრძოლი რომან დოლიძე, საკუთარ გვერდზე გულშემატკივრებს მიმართავს, რუსულ-ქართულ ურთიერთობასაც ეხელა და მათ ურთიერთპატივისცემისკენ მოუწოდებს.
ვინაიდან ჩემმა ბოლო პოსტმა დიდი ღელვა გამოიწვია, რასაც მოჰყვა ჩემი სიტყვებისა და აზრების დამახინჯება, მინდა საბოლოოდ ამოვწურო ეს თემა. რაც ყველაზე მთავარია, მინდა ყველას მოვუწოდო თავი შეიკავონ ერთმანეთის შეურაცხმყოფელი გამონათქვამებისაგან.
მე ვარ ქართველი, დავიბადე და გავიზარდე ბათუმში. უმაღლესი განათლება კი უკრაინაში მივიღე და ამ ქვეყანასთან ბევრი რამ მაკავშირებს, მათ შორის ჩემი სპორტული კარიერაც იქ დაიწყო. უკრაინის მადლიერი ვარ მისი ხალხის სიყვარულისათვის, მაგრამ ამასთანავე მე ყოველთვის საქართველოს დროშის ქვეშ გამოვდიოდი.
რუსულ ენას და რუსებს რაც შეეხება, ჩემთვის უმთავრესი ადამიანური ურთიერთობები და ქცევებია. ძალიან ბევრი რუსი მეგობარი მყავს და ვერანაირი პოლიტიკური უთანხმოება ვერ შეიტანს ჩვენს შორის განხეთქილებას.
დიახ, საქართველო ოკუპირებულია; დიახ, ჩვენ ვიბრძვით და მე მზად ვარ თავი შევწირო ჩემს ქვეყანას, მაგრამ სამშობლოს სიყვარულივით ძვირფასია ჩემთვის ღირსება და ადამიანობა. აქედან გამომდინარე, არ შემიძლია შევიძულო ადამიანი პოლიტიკური ნიშნით. ჩვენი შეგნება ამაზე მაღლა დგას. კავკასიურ მიწაზე ყველაზე მეტად ღირსება და კეთილშობილება ფასობს.
დღევანდელი მოვლენებიდან გამომდინარე, საქართველოს სიმშვიდეს და ურთიერთ პატივისცემას ვუსურვებ. – დაწერა დოლიძემ.
