ჩოგბურთის შვეიცარიელი ლეგენდა დუბაის ტურნირზე რომ აღარ იასპარეზებს ამას წინათ გამცნეთ. როჯერ ფედერერმა ეს გადაწყვეტილება დოჰაში ნიკოლოზ ბასილაშვილთან წაგების შემდეგ მიიღო და გადაწყვიტა ისევ ვარჯიშებს დაბრუნებოდა.
მაესტრო ჩოგბურთის მუდამ ქომაგთა და მედიის ყურადღების ცენტრშია. მის შესახებ ყველაფერი აინტერესებთ. რას აპირებს როჯერი და რა იქნება მისი მთავარი მიზანი მიმდინარე სეზონში? ფედერერიც ყველას ცნობისმოყვარეობას აკმაყოფილებს.
„უიმბლდონისთვის სერიოზულად ვემზადები, ვფიქრობ, სრულფასოვანი სეზონიც სწორედ ლონდონიდან დაიწყება, თუმცა არანაკლებ მნიშვნელოვანია ოლიმპიური თამაშებიც. უფრო მეტიც – მსურს ტოკიოში წარმატებას მივაღწიო. მთავარი მიზანიც ეს არის.
მთავარია, ოლიმპიური თამაშებისთვის სრულ მზადყოფნაში ვიყო და ტრავმებთან თუ ფიზიკურ კონდიციებთან დაკავშირებით არავითარი კითხვის ნიშანი არ არსებობდეს“ – ამბობს როჯერ ფედერერი.
შეგახსენებთ, შვეიცარიელი ჩოგბურთელი პეკინის ოლიმპიური თამაშების ჩემპიონია, ოღონდ წყვილთა თანრიგში. ჩინეთში მან სტენ ვავრინკასთან ერთად გაიმარჯვა.
რაც შეეხება ერთეულებს, როჯერმა 2012 წელს ლონდონში ვერცხლის მედალი მოიპოვა.
