უკვე ყველამ ვიცით, რომ ტოკიოს ოლიმპიური თამაშების გამარჯვებულები სახელმწიფოსგან საჩუქრად 1 მილიონ ლარს მიიღებენ. აღნიშნული ინფორმაცია, ქვეყნის პრემიერ-მინისტრმა, ირაკლი ღარიბაშვილმა 10 აგვისტოს, ოლიმპიელების გაცილების ცერემონიაზე გააჟღერა.
ოლიმპიადის დასრულების შემდეგ, სახელმწიფო ცერემონიების სასახლეში მთავრობის წარმომადგენლებმა ქართველ ოლიმპიელებს კიდევ ერთხელ უმასპინძლეს, სადაც უკვე ცნობილი გახდა ვერცხლის და ბრინჯაოს მედლების მფლობელების ჯილდოები.
ირაკლი ღარიბაშვილის გადაწყვეტილებით, ვერცხლის მედლის მფლობელებს – ვაჟა მარგველაშვილს, ლაშა შავდათუაშვილს, გურამ თუშიშვილს, იაკობ ქაჯაიას და გენო პეტრიაშვილს სათითაოდ საჩუქრად 500 ათასი ლალი გადაეცემათ, ბრინჯაოს მედლის პრიზიორი ანტონ პლესნოი კი 250 ათას ლარს მიიღებს.
სპორტსმენებზე დაწესებული საპრიზო ფონდების პარალელურად, სახელმწიფოსგან ჯერჯერობით არაა ცნობილი რა ბედი ელით სხვადასხვა ნაკრების მწვრთნელებს. გავრცელებული ინფორმაციით, მათ ფულადი პრიზი ჯერჯერობით არ მიუღიათ და ისიც არაა ცნობილი რამდენი ლარით დაჯილდოვდებიან. „რუსთავი 2“-ზე, გადაცემა „სპორტის საათის“ ჟურნალისტები ძიუდოისტთა ნაკრების, ძალოსანთა ნაკრების და თავისუფალი სტილით მოჭიდავეთა ნაკრების მწვრთნელებს ესაუბრნენ, რომლებმაც ამ საკითხთან დაკავშირებით საკუთარი მოსაზრებები დააფიქსირეს:
ლაშა გუჯეჯიანი (ძიუდოისტთა ნაკრების მთავარი მწვრთნელი): მაქვს განცდა, ოლიმპიელების მიღებაზე უბრალოდ არ იყო ფორმატი, რომ გაჟღერებულიყო მწვრთნელებზე და იმ ადამიანებზე დაწესებული საპრიზო ფონდი, ვინც მიიღო ამ ყველაფერში მონაწილეობა. რა თქმა უნდა ყველა უნდა დაფასდეს. კონკრეტულად ძიუდოში, მხოლოდ უფროსი მწვრთნელი არ მუშაობს. მე ჩემს პოზიციას ვაყალიბებ, თუმცა მწვრთნელთა საბჭოა, რომელშიც 6 მწვრთნელი არის გაერთიანებული და ყველამ თავისი შრომა ჩადო ამ საქმეში. ეს ადამიანები აუცილებლად უნდა დაფასდნენ როგორც ფინანსურად, ისე სიტყვიერად. დღეს მედალს ვხედავთ პირისპირ, თუმცა ამ მედლის უკან ძალიან დიდი შრომაა ჩადებული. ამის გამო იმედს ვიტოვებ, რომ ეს ყველაფერი დაფასდება.
გიორგი ასანიძე (ძალოსანთა ნაკრების მთავარი მწვრთნელი): ეჭვი არ მინდა შევიტანო ყველა იმ აღსრულებაში, რომელიც ამ საკითხთან დაკავშირებით იქნება, ვინაიდან, მიღებული ბრძანებულება ითვალისწინებს როგორც სპორტსმენების, ისევე მწვრთნელის წახალისებას. იმედია ყველა ეს გადაწყვეტილება სისრულეში იქნება მოყვანილი, რაც ისევ იმ მწვრთნელებს და მომავალ თაობებს, იმ სპორტსმენებს და ოლიმპიურ მოძრაობას გამოადგება, რომლებიც ოთხწელიწადში და ხანდახან ხუთ წელიწადში ველოდებით წარმატებას.
გიორგი იანტბელიძე (თავისუფალი სტილით მოჭიდავეთა ნაკრების მთავარი მწვრთნელი): ეტაპობრივად როგორც ვნახეთ ჯერ ჩემპიონის ჯილდო დაასახელეს, შემდეგ გაჟღერდა მედალოსნების ჯილდო და იმედი მაქვს, რომ სპორტსმენი იქნება, მწვრთნელი თუ ყველა ის ადამიანი, რომელიც ჩართული იყო ამ საქმეში, პატარა გასამჯელოს მიიღებენ ამ ყველაფრიდან.
შეგახსენებთ, რომ ტოკიო 2020-ზე ქართულმა დელეგაციამ, დამოუკიდებელი საქართველოს ისტორიაში რეკორდული რაოდენობის 8 მედალი მოიპოვა – 2 ოქრო, 5 ვერცხლი, 1 ბრინჯაო.
