ყაზანის „რუბინის“ მთავარმა მწვრთნელმა, ლეონიდ სლუცკიმ პირველი არხის ეთერში, გადაცემა „ტაიმაუტთან“ ექსკლუზიურ ინტერვიუში ხვიჩა კვარაცხელიას შესახებ ისაუბრა.
რუსი სპეციალისტის განცხადებით, 20 წლის ქართველ ფეხბურთელს სატრანსფერო ფანჯრის დასრულების დიდი ფსიქოლოგიური წნეხი ჰქონდა, რამაც მის თამაშზე უარყოფითი გავლენა იქონია. თუმცა, სლუცკი იმედოვნებს, რომ ხვიჩა კვარაცხელია ამ წნეხს მალე დაძლევს და ასპარეზობას ჩვეულ სტილში გააგრძელებს.
„ის აურზაური, რაც მის გარშემო სატრანსფერო ფანჯრის დროს ტრიალებდა, არ შეიძლებოდა ამას ხვიჩაზე გავლენა არ მოეხდინა. კლუბს არ მიუღია არანაირი შეთავაზება ხვიჩა კვარაცხელიას ტრანსფერთან დაკავშირებით. იმაზე საუბარი, რომ რუბინი გადამეტებულ ფასს ასახელებდა და ფეხბურთელს წასვლაში ხელს უშლიდა, ეს არის თითიდან გამოწოვილი ბრალდებები. კიდევ ერთხელ ვიმეორებ ხვიჩას ტრანსფერზე შეთავაზებები არ მიგვიღია. ის აჟიოტაჟი, რომელიც ხვიჩას მამის და მისი აგენტის მხრიდან შეიქმნა გარკვეულწილად გადაჭარბებული იყო, ვიდრე რეალობა. ხვიჩა ახალგაზრდაა და ბუნებრივია, ეს მის ფსიქოლოგიაზე იმოქმედებდა. მას რაღაც მომენტში მას დაავიწყდა ფეხბურთი და იმას ფიქრობდა, თუ რა შეიძლებოდა მოსვლოდა, რა დონეზე უნდა გადასულიყო, ვისთან უნდა ეთამაშა და ა.შ.
ასე ვიტყვი: ფეხბურთი საკმაოდ სამართლიანი სპორტია და გარკვეულწილად პასუხს ცემს ხვიჩას იმაზე, რომ ბოლო პერიოდში მოედანზე თავდადებით არ თამაშობდა. რაც შეეხება საწვრთნელ სამუშაოებს, ხვიჩა კარგად მუშაობს. მას ესმის, რომ ტრანსფერი არ შედგა, პარალელურად, ვუხსნით, რომ ამ ტრანსფერისთვის არავითარი წინაპირობები არ არსებობდა. გასაგებია, რომ ამ ყველაფრის ფონზე მისი ემოციურად გამოწვა და გამოფიტვა მოხდა, ამას დაემატა ტრავმა, პლუს დიდი წნეხი, რომელიც მის მომავალთან დაკავშირებით ქართული საზოგადოებისგან არსებობს. როდესაც ეს ყველაფერი თავზე 20 წლის ასაკში გეცემა, გადატანა შედარებით რთულია. მაგრამ, ეჭვიც არ მეპარება, რომ ის ამ მდგომარეობას თავს გაართმევს.
ის კვლავ რჩება დიდ ფეხბურთელად ჩვენს კლუბში. მასზე დიდ იმედებს ვამყარებთ და ყველაფერში მხარს დავუჭერთ“, – განაცხადა ლეონიდ სლუცკიმ გადაცემა „ტაიმაუტის“ ეთერში.
