ესპანეთის ნაკრებისთვის ევროპის ჩემპიონატი არცთუ ისე წარმატებულად დაიწყო. ლუის ენრიკეს გაწრთვნილებმა სასტარტო მატჩში შვედეთის ნაკრებთან უგოლო ფრე ითამაშეს და ქულები დაკარგეს.
რა თქმა უნდა, ესპანეთის ნაკრების ქომაგები შედეგით იმედგაცრუებულნი არიან, თუმცა ჯერ ყველაფერი წინ არის და არც ეს ყოფილა პირველი შემთხვევა, როდესაც „ფურია როხა“ ამა თუ იმ მსხვილ ფორუმს მოგების გარეშე იწყებს.
ამასობაში, სევილიაში გამართულ დაპირისპირებაში ერთი მნიშვნელოვანი ფაქტი დაფიქსირდა. პედრი გახდა ყველაზე ახალგაზრდა ფეხბურთელი, რომელმაც მსხვილ ტურნირზე თავისი ქვეყნის ნაკრების მაისურით ითამაშა.
„ბარსელონას“ ფეხბურთელი სასტარტო შემადგენლობაში გამოჩნდა და მისი ასაკი 18 წელს და 201 დღეს ითვლიდა.
პედრიმ სესკ ფაბრეგასის რეკორდი გააუმჯობესა, რომელმაც 2006 წლის მსოფლიოს ჩემპიონატზე 19 წლის და 41 დღისამ გააგორა ბურთი.
