ქართული კლუბებისთვის 2021/22 წლების სეზონიც შედეგის მხრივ წარუმატებელი გამოდგა, თუმცა ფინანსური თვალსაზრისით ოთხივე გუნდმა მეტნაკლებად იხეირა. გათამაშებას ყველა ქართველი კლუბი გამოეთიშა, მაგრამ შედარებით დადებითად მაინც ბათუმის „დინამოს“ გამოსვლა უნდა შეფასდეს, რომელმაც ისტორიული შედეგი დადო და მესამე საკვალიფიკაციო ეტაპამდე გავიდა.
არჩილ ბერიძის გუნდს ფლეი-ოფში გასაღწევად სულ ცოტა დააკლდა, თუმცა გამოვარდნის მიუხედავად უეფასგან სოლიდური რაოდენობის თანხა ერგო – 850 000 (3 085 260 ლარი).
საქართველოს მოქმედი ჩემპიონი, თბილისის „დინამო“ თავდაპირველად ჩემპიონთა ლიგის საკვალიფიკაციო ეტაპზე ჩაერთო, თუმცა ბაქოს „ნეფთჩის“ ბარიერის დაძლევა ვერ შეძლო და ავტომატურად კონფერენს ლიგის მეორე საკვალიფიკაციოზე გადაინაცვლა. აქ თბილისურ კლუბს ჰაიფას „მაკაბი“ დახვდა და ორი მატჩის ჯამში 2:7 დამარცხდა. შედეგად, კახა ცხადაძის გაწვრთნილ გუნდს ევროპული ფეხბურთის მმართველი ორგანოდან 810 000 ევრო ერგო (2 940 071).
საქართველოს ჩემპიონის და ვიცე-ჩემპიონის გარდა, ევროტურნირების საკვალიფიკაციო ეტაპზე მონაწილეობას მესამეადგილოსანი გორის „დილაც“ იღებდა. გორელები პირველივე წრეში საკმაოდ გამოცდილ, სლოვაკურ „ჟილინას“ შეხვდნენ და ორი მატჩის ჯამში 6:3 დამარცხდნენ. გორელებს უეფამ 250 000 ევრო გადასცა (896 750 ლარი).
და ბოლოს, დავით ყიფიანის სახელობის თასის გამარჯვებული, ეროვნული ლიგა 2-ის წევრი „გაგრა“. კონფერენს ლიგის პირველ საკვალიფიკაციო ეტაპზე მათი მეტოქე მონტენეგროს ჩემპიონატის ვიცე-ჩემპიონი, „სუტიესკა“ იყო. გაგრელები ორი მატჩის ჯამში 1:2 დამარცხდნენ და გათამაშებას პირველივე წრეში გამოეთიშნენ. ამის მიუხედავად, მათ უეფასგან მაინც სოლიდური რაოდენობის თანხა ერგოთ – 250 000 ევრო (896 750 ლარი).
საერთო ჯამში ქართულმა კლუბებმა 2 160 000 ევრო გამოიმუშავეს, რაც 7 მილიონ ლარზე მეტია.
