ფრენკის ახალგაზრდული – როგორი იქნება ლამპარდის მომავალი?

„ჩელსიდან“ დათხოვნის შემდეგ ფრენკ ლამპარდი დღემდე უმუშევარია. ახალგაზრდა სპეციალისტს ჯერჯერობით შემოთავაზებები არ აქვს, მაგრამ ეს ალბათ დროებითია.

ამასობაში, ფეხბურთის მოყვარულთ ეცოდინებათ, რომ უნგრეთსა და სლოვენიაში 21 წლამდე ევროპის ჩემპიონატი გაჩაღებულა, სადაც ჯგუფური ეტაპის დაპირისპირებები იმართება. ჰოდა, შეიძლება ისეც მოხდეს, რომ აღნიშნულმა ტურნირმა ლამპარდის მომავალიც განსაზღვროს. კერძოდ, ფრენკს ინგლისის ახალგაზრდული ნაკრების თავკაცობა ანდონ.

ინგლისის 21 წლამდე ნაკრებმა ევროპის ჩემპიონატზე მიჯრით ორი მატჩი წააგო. ნისლიან ალბიონელებს ჯერ შვეიცარიელებმა (1:0, ხოლო შემდეგ პორტუგალიელებმა (2:0) აჯობეს და ჯგუფიდან გასვლის მიზერული შანსიღა დარჩათ. რა თქმა უნდა, ინგლისის ფეხბურთის ასოციაცია შედეგით უკმაყოფილოა და მთავარი მწვრთნელის ენდი ბოტროიდის დათხოვნას აპირებენ.

ბრიტანული მედია კი წერს, რომ ვაკანტურ თანამდებობაზე ერთ-ერთი მთავარი კანდიდატი ფრენკ ლამპარდიაო.