ევროპის ჩემპიონატი ნელ-ნელა საინტერესო ფაზაში გადადის. პლეიოფები ის სტადიაა, სადაც ადრენალინის დოზაც მატულობს და ვნებათაღელვაც პიკს აღწევს.
ნიდერლანდების და ჩეხეთის წყვილში სპეციალისტები ფავორიტად ნარინჯისფერებს მიიჩნევდნენ, თუმცა ფრანკ დე ბურის შეგირდებმა მეტოქესთან ვერაფერი გააწყეს და ბუდაპეშტის გადაჭედილ „პუშკას არენაზე“ 0:2 წააგეს.
მატჩის შემდეგ, ნიდერლანდელთა თავკაცი ფრანკ დე ბური ბუნებრივია იმედგაცრუებული ჩანდა.
„მეტოქე რთული იყო. ევროპის ჩემპიონატზე მარტივი გასეირნება არავისთან გექნება, თუმცა ახლაც დარწმუნებული ვარ, რომ ჩვენ მათზე ძლიერები ვიყავით. ამით იმის თქმა მსურს, რომ მარცხს არ ვიმსახურებდით.
მოედანზე ვითარებას ვაკონტროლებდით, თუმცა შემდეგ კაცნაკლული დავრჩით და ამან სიტუაცია საგრძნობლად შეცვალა. ჩემი გუნდი გატყდა.
პირველ ტაიმში რამდენიმე ხელსაყრელი შანსი ხელიდან გავუშვით. ასეთ მატჩებში კი საგოლე მომენტები მაქსიმალურად უნდა გამოიყენო, თორემ შემდეგ დაისჯები. ასეც დაგვემართა.
გაშვებული გოლის შემდეგ ჩეხებს გული მიეცათ და უფრო კარგად ათამაშდნენ. მალევე მეორე გაიტანეს და ამით ყველაფერი დასრულდა“ – აღნიშნა ნარინჯისფერთა მთავარმა მწვრთნელმა.
