ცოტა ხნის წინ გავრცელდა ინფორმაცია, რომ ფრანგული კლუბები შეთანხმდნენ და ფეხბურთელებს ნაკრებში არ გაუშვებდნენ.
„საფრანგეთის ლიგა 1-ის და ლიგა 2-ის კლუბებმა ხმათა უმრავლესობით გადაწყვიტეს, რომ ფეხბურთელები სანაკრებო მატჩებზე არ გაუშვან. ფრანგულ კლუბებში მოთამაშე ფეხბურთელებს ევროკავშირის საზღვრებისა და ევროპის ეკონომიკური ზონის დატოვება მარტის სანაკრებო პაუზის პერიოდში პანდემიის გამო ეკრძალებათ“, – ნათქვამია საფრანგეთის პროფესიული ლიგის ოფიციალური გვერდის განცხადებაში.
ამის გამო გაჩნდა ეჭვი, რომ ეროვნულ გუნდს შესაძლოა კაპიტანი ჯაბა კანკავა გამოკლებოდა, თუმცა ეს ინფორმაცია საქართველოს ფეხბურთის ფედერაციაში არ დაადასტურეს, რაც უდავოდ შესანიშნავი ამბავია, რადგან ჯაბა საქართველოს ნაკრებისთვის უდიდეს ძალას წარმოადგენს.
შეგახსენებთ, რომ საქართველოს ეროვნულ ნაკრებს მნიშვნელოვანი მატჩები ელის – შესარჩევ ციკლს შვედებთან 25 მარტს სტოკჰოლმში მატჩით დაიწყებს, 28 მარტს ესპანეთის ნაკრებს უმასპინძლებს, საკვალიფიკაციო ეტაპის მესამე ტურში, 31 მარტს საბერძნეთს სალონიკში ესტუმრება. სამივე მატჩის პირდაპირ რეპორტაჟს საქართველოს პირველი არხი შემოგთავაზებთ.
