UFC-ის ორგზის ჩემპიონს კონორ მაკგრეგორს ახალი გამოწვევები მოსწყურდა. უფრო სწორად, ირლანდიელ მებრძოლს მადა და ინტერესი სხვამხრივ გაეხსნა და სიახლის ძიებაშია.
რამდენიმე თვის წინ უცხოურ მედიაში გაჩნდა ინფორმაცია, რომ მაკგრეგორს „მანჩესტერ იუნაიტედის“ აქციების შეძენა, უფრო გასაგებად რომ ვთქვათ, კლუბის შესყიდვა სურდა.
კონორმა ამის შესახებ საჯაროდაც ისაუბრა, თუმცა მანჩესტერულ გრანდთან დაკავშირებით ყინული არ დაძრულა და მაკგრეგორის სურვილიც სურვილად დარჩა.
ირლანდიელ სპორსტმენს თავის განზრახვაზე ხელი არ აუღია და ამჯერად სხვა გუნდის მიმართ გააქტიურდა. კონორმა დაადასტურა, რომ მოლაპარაკებები წამოიწყო გლაზგოს „სელტიკის“ აქციების შეძენასთან დაკავშირებით.
„სიმართლე გითხრათ, სელტიკის ირგვლივ საუბარი ახლა დაიწყო. დერმონტ დესმონდს უკვე ვესაუბრე და ვნახოთ ამ საქმიდან რა გამოვა. იმედი მაქვს, რომ გუნდის აქციებს შევისყიდი.
მე კვლავ დაინტერესებული ვარ რომელიმე საფეხბურთო კლუბის შეძენით. „მანჩესტერ იუნაიტედიც“ მომწონდა და „სელტიკიც“. ორივე დიდი გუნდია.
ყოველთვის გულწრფელი ვიყავი და ახლაც მწამს, რომ რომელი გუნდიც არ უნდა იყოს, ბევრი სასარგებლო საქმის გაკეთება შემიძლია“ – ამბობს კონორ მაკგრეგორი.
ირლანდიელი მებრძოლი UFC-ის ეგიდით მორიგ ბრძოლას 10 ივლისს დასტინ პიორესთან გამართავს.
