ტოკიოს ზაფხულის ოლიმპიური თამაშები კარს მოგვადგა, სადაც საქართველოს დელეგაცია 35 ათლეტით წარსდგება. სპორტსმენთა ნაწილი უკვე იაპონიის დედაქალაქშია და მოახლოებული ფორუმისთვის ადგილზე ემზადება.
ამასობაში კი ქართველი ჩოგბურთელის, ოქსანა კალაშნიკოვას სკანდალურმა განცხადებამ მეხივით დაიქუხა. 30 წლის ჩოგბურთელის თქმით მან წყვილთა თანრიგში ტოკიოს ოლიმპიური თამაშების ლიცენზია მოიპოვა და იქ ეკატერინე გორგოძესთან ერთად უნდა ეასპარეზა, თუმცა დაუდევრობის გამო მათ იქ ვერ ვიხილავთ, რადგან ქართულ მხარეს განაცხადის გაგზავნა დაავიწყდაო.
ამ საკითხთან დაკავშირებით ოფიციალური განცხადებები მყისვე გაავრცელეს, როგორც საქართველოს ეროვნულმა ოლიმპიურმა კომიტეტმა, ასევე ჩოგბურთის ფედერაციამაც, სადაც ორივე მხარე თითს ერთმანეთისკენ იშვერს.
თავად ოქსანა კალაშნიკოვამ კი კიდევ ერთი განცხადება გაასაჯაროვა და საზოგადოებას ახალი გადაწყვეტილების შესახებ ამცნო.
„გადავწყვიტე სპორტის საარბიტრაჟო სასამართლოს მივმართო და სიმართლის დადგენა იქ ვცადო, რადგან ჩემს სამშობლოში სამართლიანობას ვერ ვპოულობ. არ ვიცი რა იქნება შედეგი და საერთოდ რა მოხდება. თავიანთი არაპროფესიონალიზმისა და უპასუხისმგებლო შეცდომის გამო პასუხისმგებლობის საკუთარ თავზე აღება არავის უნდა“ – წერს ოქსანა კალაშნიკოვა ტვიტერის საკუთარ გვერდზე.
