საფრანგეთის დედაქალაქ პარიზში ხვალ ძიუდოს გრანდ სლემი აიღებს სტარტს. აღნიშნულ ტურნირზე საქართველოს სახელით 5 ძიუდოისტი იასპარეზებს.
პირველ დღეს ქართული დროშას ვაჟა მარგველაშვილი (73) და ეთერ ლიპარტელიანი (57) დაიცავენ.
ეთერი ტურნირზე პირველ ნომრად არის განთესილი. ქართველ ძიუდოისტს ოქროს მედლის მოპოვების რეალური შანსი ექნება. ახალგაზრდა სპორტსმენი პირველ წრეში დაისვენებს, 1/8-ში კი მისი მეტოქე მაურიტიუსელი სპორტსმენი იქნება.
ვაჟა მარგველაშვილი პირველ რაუნდში კანადელ სპორტსმენს შეხვდება, წარმატების შემთხვევაში კი მისი მეტოქე დიდი ალბათობით მასპინძელი გუილემ ჩაინე იქნება. საგულისხმოა, რომ მარგველაშვილი ამ წონაში მხოლოდ ამ ტურნირზე იასპარეზებს და მომდევნო შეჯიბრებებში თავის საყვარელ 66 კილოგრამ წონით კატეგორიას დაუბრუნდება.
ცნობისთვის, წინასწარი შეხვედრები თბილისის დროით 14:00-ზე დაიწყება, ფინალური ბლოკი კი 19:00-ზე შედგება.
