ტოკიოს რიგით 32-ე ზაფხულის ოლიმპიური თამაშები ოფიციალურად მალე გაიხსნება. საქართველოს დელეგაცია იაპონიის დედაქალაქში 35 სპორტსმენით იქნება წარმოდგენილი.
ცხადია, მეტი ლიცენზიის შანსი ყოველთვის არსებობს და ოთხწლეულის ამ გრანდიოზულ სპორტულ ფორუმზეც, სხვადასხვა დროს საქართველო რაოდენობრივად უკეთესადაც ყოფილა წარმდგარი, თუმცა ის აჟიოტაჟი, რაც ამჟამად არის ატეხილი რბილად რომ ვთქვათ სასაცილოცაა და სატირალიც.
მოკლედ, პანდემიის გამო ერთი წლით გადავადებული „ტოკიო 2020“ , საქართველოს დელეგაციისთვის არცთუ ისე ამაღლებული განწყობით იწყება. ჩოგბურთელ ოქსანა კალაშნიკოვას სკანდალურმა განცხადებამ ბუნებრივია დიდი მითქმა-მოთქმა გამოიწვია. 30 წლის ქართველი ჩოგბურთელი პირდაპირ აცხადებს, რომ მან წყვილთა თანრიგში ოლიმპიადის ლიცენზია მოიპოვა, სადაც ეკატერინე გორგოძესთან ერთად უნდა ეასპარეზა, მაგრამ დაუდევრობის გამო ეს შანსი მომისპეს, რადგან ტოკიოში განაცხადის გაგზავნა დაავიწყდათო.
ვერაფერს ვიტყვით. მართლაც გამაოგნებელი განცხადებაა. მოგვიანებით ოქსანა კალაშნიკოვამ აღნიშნა, რომ დანებებას არ აპირებს და სიმართლის დასადგენად სპორტის საარბიტრაჟო სასამართლოს მიმართა, რადგან საკუთარ ქვეყანაში ერთმანეთზე გადაბრალებით არიან დაკავებულნი და იმედი არ მაქვს ყველაფერს ნათელი მოეფინოსო.
გამოცდილი ჩვენებური სპორტსმენი, სოციალურ ქსელში კიდევ ერთ სკანდალურ განცხადებას აქვეყნებს, სადაც აღნიშნავს, რომ მის სიტყვებში ეჭვი არავის უნდა შეეპაროს.
„თუ ვინმეს ეჭვი ეპარება ჩემს სიტყვებში, მე მაქვს იმის დამადასტურებელი დოკუმენტები, რომ ჩვენი განაცხადი არ იყო გაგზავნილი“ – აღნიშნავს ოქსანა კალაშნიკოვა.
შეგახსენებთ, ოქსანა კალაშნიკოვა და ეკატერინე გორგოძე ამჟამად პოლონეთში მიმდინარე WTA-ს 250-იანი კატეგორიის ტურნირზე იმყოფებიან, სადაც წყვილთა თანრიგში უკვე ნახევარფინალში გავიდნენ.
რაც შეეხება ერთეულთა შეჯიბრს, ეკატერინე გორგოძე აქაც წარმატებით ასპარეზობს, საკვალიფიკაციო ეტაპის გავლის შემდეგ, ძირითად ბადეშიც ორი წრე გადალახა და უკვე მეოთხედფინალშია.
