საქართველოს ნაკრების 27 წლის ფეხბურთელმა ნიკა კაჭარავამ „ანორთოსისი“ დატოვა. ინფორმაციას კვიპროსული გუნდი სოციალურ ქსელში ავრცელებს.
მათივე ინფორმაციით, ქართველმა ფეხბურთელმა და კლუბმა თანამშრომლობა ურთიერთშეთანხმების საფუძველზე შეწყვიტეს.
კლუბის დატოვების სავარაუდო მიზეზად კვიპროსის ჩემპიონატის მე-11 ტურში, „აპოელისა“ და „ომონიას“ შეხვედრა სახელდება. „აპოელმა“ მეტოქე 4:2 დაამარცხა, ერთ-ერთი გოლი კი გიორგი ქვილითაიამ გაიტანა. აღნიშნულ შეხვედრას ნიკა კაჭარავა გურამ კაშიასთან ერთად ესწრებოდა, ფეხბურთელებმა კი გიორგი ქვილითაიას გოლი ემოციურად აღნიშნეს, რასაც „ანორთოსისის“ ქომაგების და ხელმძღვანელების უკმაყოფილება მოყვა.
მოგვიანებით, კაჭარავამ სოციალურ ქსელში „ანორთოსისის“ ქომაგებს ბოდიშიც მოუხადა:
„მინდა, პატარა განცხადება გავაკეთო დღევანდელ ვიდეოსთან დაკავშირებით. საქართველოს ნაკრებში ჩემს თანაგუნდელ და კაპიტან, გურამ კაშიასთან ერთად ვიყავი „აპოელისა“ და „ომონიას“ შეხვედრაზე. გურამმა ვიდეო გადაიღო, რომელშიც ქვილითაიას გოლს აღნიშნავს. მე ამაზე უბრალოდ გამეღიმა, რადგან ბავშვივით ზეიმობდა. არასდროს აღვნიშნავ მეტოქეების გოლებს, ყოველთვის პატივს ვცემ „ანორთოსისის“ გულშემატკივრებს და მუდამ ვგრძნობ თქვენს მხარდაჭერას. ამ ვიდეოს გამო თუ ვინმე განაწყენდა, მინდა, ბოდიში მოგიხადოთ”, – განაცხადა ნიკა კაჭარავამ.
თუმცა როგორც ჩანს კვიპროსულმა გუნდმა ეს საქციელი სწორად არ მიიჩნია და ქართველ ფეხბურთელთან კონტრაქტი გაწყვიტა.
ფამაგუსტური გუნდი ნიკას მადლობა უხდის გაწეული სამუშაოსთვის და მომავალში წარმატებებს უსურვებს.
შეგახსენებთ, რომ ნიკა კაჭარავამ კვიპროსულ გუნდში 62 ჩატარებულ შეხვედრაში 12 გოლი გაიტანა და 2 საგოლე გადაცემა მიითვალა.
