ესპანეთში, „ალავესის“ B გუნდში რომ ქართველი ფეხბურთელი, გიორგი გაგუა თამაშობს ეს უცხო უკვე არავისთვის არაა. ახალი ამბავი კი ის არის, რომ ახალგაზრდა ფეხბურთელმა რამდენიმე დღის წინ „ალავესის“ მთავარ გუნდთან ერთად ივარჯიშა და როგორც თვითონ ამბობს მთავარ მწვრთნელის – ხოსე ლუის მენდილიბარის სიმპათიაც დაიმსახურა.
საგულისხმოა, რომ გაგუა „ალავესის“ მთავარი გუნდის შემადგენლობაში პრე-სეზონზეც მოგვევლინა და მაშინ ორი გოლის გატანაც შეძლო და სავარაუდოდ, მისი ლა ლიგაში დებიუტთან შორს არ ვართ.
„პრაიმ სპორტის“ გუნდი გიორგის ესპანეთში დაუკავშირდა. ახალგაზრდა ქართველი ფეხბურთელი თავის ამჟამინდელ მდგომარეობაზე, სამომავლო გეგმებსა და მიზნებზე გვესაუბრა:
– ხეტაფესთან მატჩის მოსამზადებელ ეტაპზე ალავესის პირველ გუნდთან ერთად ივარჯიშე. როგორი გრძნობა იყო, რა გითხრა მწვრთნელმა?
– ძალიან გამიხარდა პირველ გუნდთან ერთად რომ მომიწია ვარჯიში. მწვრთნელთან პირადად არ მისაუბრია, თუმცა მან აკადემიის დირექტორთან უთხრა. რომ მოვეწონე და კარგი შთაბეჭდილება დარჩა.
– როგორ შეაფასებდი შენს მდგომარეობას ალავესში, მალე უნდა ველოდოთ ლა ლიგაში დებიუტს?
– მდგომარეობას ძალიან დადებითად შევაფასებდი. რაც შეეხება ლა ლიგაში თამაშს, ამის შანსი ყოველ კვირას არის, მაგრამ ამჟამად ბოლომდე ალავეს B-ში პროდუქტიულად თამაშზე ვარ კონცეტრირებული.
– რამდენად გაზარდა შენი შანსები ხოსე ლუის მენდილიბარის მოსვლამ, როგორ დაახასიათებდი მას?
– შანსები არ ვიცი, თუმცა როგორც ზემოთ აღვნიშნე, მასზე კარგი შთაბეჭდილება დავტოვე. როგორც მწვრთნელი ძალიან გამოცდილია, ლა ლიგაში მას უკვე 400-ზე მეტი თამაში აქვს ჩატარებული.
– რამდენიმე კვირის წინ კორონავირუსი გადაიტანე, რამდენად იმოქმედა ამან გავლენა შენს ფიზიკურ ფორმაზე და როგორ გრძნობ ახლა თავს?
– კორონამ ცოტა შემაფერხა, მაგრამ ჩემს ძველ ფორმას უკვე დავუბრუნდი და ყველაფრისთვის მზად ვარ.
– ალავესი ლა ლიგაში ადგილის შესანარჩუნებლად იბრძვის, შენი აზრით რა შანსები გაქვთ უმაღლეს დივიზიონში დასარჩენად?
– ძალიან რთული სათქმელია რა იქნება მომავალში, მაგრამ იმედი მაქვს ადგილს შევინარჩუნებთ და ამაში წვლილს მეც შევიტან.
– ალავესის ფანებს როგორ დაახასიათებდი?
– ძალიან ტრადიციულები არიან… დიდი ისტორია აქვთ ერთად გამოვლილი. რა თქმა უნდა, სულ გვერდში გვიდგანან და გვამხნევებენ.
– რა შეგიძლია გვითხრა ხოსელუზე? გუნდში შენს კონკურენტად ალბათ სწორედ ის მოიაზრება…
– ძალიან გამოცდილი და კარგი თავდამსხმელია. შეიძლება ითქვას, რომ მსგავსი სტილის თავდამსხმელები ვართ და სულ ვცდილობ, რომ მისგან რამე ვისწავლო.
– გიორგი მამარდაშვილზე რას იტყოდი, როგორც ვიცი მის მატჩსაც დაესწარი…
– მამარდა პირველ რიგში ძალიან კარგი ადამიანია და ასევე კარგი მეგობარი. მის თამაშს ძალიან რთულ სტადიონზე – სან მამესზე დავესწარი, სადაც 90 წუთი წნეხის ქვეშ ხარ, საოცარი გარემოა. ამ ყველაფერს ძალიან კარგად გაართვა თავი და ეტყობა, რომ ძალიან დიდი მომავალი აქვს. საერთოდ არ ეტყობა ასეთი ახალგაზრდა რომ არის.
– 2023 წელს საქართველოში 21-წლამდე ევროპის ჩემპიონატი ჩატარდება. როგორ ფიქრობ, დაგეხმარება თუ არა ეს ტურნირი კარიერულ წინსვლაში?
– რა თქმა უნდა, ასეთი ტურნირები სულ გეხმარება გაზრდაში და გამოცდილების დაგროვებაში.
– რა არის შენი მიზანი და ოცნება?
– ამ ეტაპზე ალავესის პირველი გუნდში მოხვედრა და ლა ლიგაში დებიუტი. ასევე, ეროვნულ ნაკრებში თამაში და ტიტულის მოგება. მინდა, რომ ქართულ ფეხბურთში ჩემი სახელი დავტოვო და მაქსიმუმი ვაჩვენო, ვიყო საამაყო სპორტსმენი პირველ რიგში ოჯახისთვის და შემდეგ ქართველი ხალხისთვის.
