ბუდაპეშტში დასრულდა ევროპის საკვალიფიკაციო ტურნირი სადაც საქართველოს ბერძნულ-რომაული სტილით ნაკრებმა სამივე სინჯის თითო მედალი და რაც ყველაზე მნიშვნელოვანია ორი ოლიმპიური საგზურიც მოიპოვა.
ტურნირის ჩემპიონი რამაზ ზოიძე (67 კგ) გახდა, ფინალში ჩვენებურს უნგრელი კორპასი არ გამოუცხადდა, მანამდე კი უკრაინელი პოლიტაევი 6-5, ხორვატი იანეჩიჩი 8-0 და ოლიმპიური ლიცენზიისათვის სომეხი სლავიკ გალსტიანი 10-1 დაამარცხა.
ოლიმპიური საგზური მოიპოვა მსოფლიოს ჩემპიონმა ლაშა გობაძემაც (87 კგ) ვინც ფინალში აღარ იჭიდავა და ვერცხლის მედალს დასჯდერა, გობაძემ ფინალამდე თურქების მსოფლიოს ჩემპიონს ბასარს 1-1, სომეხ შაჰინიანს 6-4 და ტიოკიოს ლიცენზიისთვის ბრძოლაში რუს ალირზაევს 9-5 მოუგო.
ბრინჯაოს მედალი ირაკლი ძიმისტარაშვილმა (60 კგ) მოიპოვა, მედლისათვის ბრძოლაში ირაკლიმ ძლიერი უნგრელი ერიკ ტორბა 4-2 დაამარცხა. თუმცა ლიცენზიის მოპოვებისათვის ფინალში გასვლა იყო საჭირო. მედლის გარეშე მხოლოდ გელა ბოლქვაძე (77 კგ) დარჩა, პირველ შეხვდრაში რუმინელი კოიოკარის დამარცხების შემდეგ 6-2, რუს ჩეჰირკინთან დაძაბულ ბრძოლაში მხოლოდ ბოლო წამებზე დასანანი შეხვედრა დათმო 1-2.
ამრიგად ექვსი ოლიმპიური წონითი კატეგორიიდან საქართველოს ბერძნულ-რომაულ ნაკრებს 67, 87, 97 და 130 კგ. კატეგორიებში ოლიმპიური ლიცენზიები მოპოვებული აქვს, შეგახსენებთ რომ ნურსულათანში 2019 წლის მსოფლიოს ჩემპიონატზე გიორგი მელიამ (97 კგ) და იაკობ ქაჯაიამ (130 კგ) შეძლეს საგზურების მოპოვება. დარჩენილია კიდევ ერთი სალიცენზიო ტურნირი, რომელიც სოფიაში (6-9 მაისს) გაიმართება, სადაც საგზურებს კვლავ ფინალში გასული ფალავნები მიიღებენ.
